UN៖ ប្រភពនានាពីអ្នកការទូតបាននិយាយកាលពីថ្ងៃអង្គារថា ក្រុមប្រឹក្សាសន្តិសុខអង្គការសហប្រជាជាតិនឹងរៀបចំជំនួបបន្ទាន់មួយនៅថ្ងៃពុធនេះ ជុំវិញភាពរំជើបរំជួលដ៏ខ្លាំងក្លាកំពុងផ្ទុះឡើងរវាងអ៊ីស្រាអែល និងប៉ាឡេស្ទីន ដែលជាសម័យប្រជុំលើកទី២ របស់ខ្លួនក្នុងរយៈពេល ៣ថ្ងៃ។
កិច្ចប្រជុំបិទទ្វារនេះធ្វើឡើងតបតាមសំណើ របស់ប្រទេសទុយនីស៊ី ន័រវែស និងចិន។ ជំនួបលើកដំបូងដែលធ្វើឡើងកាលពីថ្ងៃច័ន្ទ បានបញ្ចប់ទៅដោយពុំមានសេចក្ដីថ្លែងការណ៍រួម ដោយសហរដ្ឋអាមេរិកបានបង្ហាញជំហរស្ទាក់ស្ទើរ ក្នុងការទទួលយកសេចក្ដីថ្លែងការណ៍ព្រៀង ដែលបានជំទាស់ដោយប្រទេសន័រវែសនៅត្រង់ចំណុចនេះ។ អត្ថបទដែលសារព័ត៌មាន AFP ទទួលបាន នឹងអំពាវនាវឲ្យអ៊ីស្រាអែលបញ្ឈប់សកម្មភាព សាងសង់តំបន់លំនៅឋាន ការវាយកម្ទេចសំណង់ និងការបណ្ដេញពលរដ្ឋប៉ាឡេស្ទីន រួមទាំងនៅក្នុងទីក្រុង Jerusalem ខាងកើតផងដែរ។
នៅក្នុងសេចក្ដីថ្លែងការណ៍របស់ក្រុមសមាជិក ក្រុមប្រឹក្សាសន្តិសុខអង្គការសហប្រជាជាតិ ក៏បានបង្ហាញក្ដីបារម្ភយ៉ាងខ្លាំងផងដែរ ចំពោះភាពតានតឹង និងអំពើហិង្សាចេះតែរីកធំនៅក្នុងតំបន់គ្រប់គ្រងដោយអ៊ីស្រាអែល West Bank និងទីក្រុង Jerusalem ខាងកើត ដែលអ៊ីស្រាអែលបានបញ្ចូលជាឧបសម្ព័ន្ធ និងចាត់ទុកជាផ្នែកនៃរដ្ឋធានីរបស់ខ្លួន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
