កំណាត់ផ្លូវជាតិលេខ២៣ ប្រវែងជិត២០គីឡូម៉ែត្រ ជាគម្រោង​ឥណទាន​សម្បទា​ន​របស់​ធនាគារ​អភិវឌ្ឍន៍​អាស៊ី បានបើកការដ្ឋានលើកកម្រិតគុណភាព ជួសជុល និងថែទាំ ចាប់ពីគល់ស្ពាន​កោះ​ធំ ឃុំជ្រោយតាកែវ ឆ្លងកាត់ឃុំលើកដែក ស្រុកកោះធំ រហូតដល់ឃុំពាមរាំង ស្រុកលើកដែក ភ្ជាប់​ជាមួយ​ផ្លូវ​ខេត្តលេខ១៤ នៃភូមិសាស្រ្តខេត្តកណ្តាល។ ពិធីបើកការដ្ឋានបានធ្វើឡើងនាព្រឹកថ្ងៃទី២០ ខែមិថុនា ឆ្នាំ២០២៣ ក្រោមអធិបតីភាព ឯក​ឧត្ដម​អគ្គ​បណ្ឌិត​សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាង​ដ៏ខ្ពង់ខ្ពស់សម្តេចតេជោនាយករដ្ឋមន្រ្តី អញ្ជើញអមដំណើតដោយឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោកជំទាវ កិត្តិ​សង្គហ​បណ្ឌិត ឃួន សុដារី អនុប្រធានទី២ នៃរដ្ឋសភា លោកស្រី យូតសាណា វ៉ាម៉ា នាយិកា​ធនាគារ​អភិវឌ្ឍន៍​អាស៊ី ប្រចាំព្រះរាជាណាចក្រកម្ពុជា ឯកឧត្តម លោកជំទាវ សមាជិក សមាជិកា​ព្រឹទ្ធសភា រដ្ឋសភា និងរាជរដ្ឋាភិបាល ប្រជាពលរដ្ឋ លោកគ្រូ អ្នកគ្រូ និង​សិស្សានុសិស្ស​ជាច្រើន​នាក់​។

ឯកឧត្តមទេសរដ្ឋមន្ត្រីស៊ុន ចាន់ថុល បានថ្លែង​អំណរ​គុណយ៉ា​ង​ជ្រាល​ជ្រៅដ​ល់​ធនាគារ​អភិវឌ្ឍន៍​អាស៊ី ដែលបានផ្តល់ឥណទានសម្បទាន និងជំនួយបច្ចេកទេសផ្សេងៗ​ជា​បន្តបន្ទាប់​ សម្រាប់​ការ​អភិវឌ្ឍ​វិស័យ​ហេដ្ឋារចនាសម្ព័ន្ធផ្លូវថ្នល់ ប្រព័ន្ធលូចម្រោះសម្អាតទឹកកខ្វក់ និងស្ថានីយបូមទឹក ប្រព័ន្ធ​លូរំដោះទឹកភ្លៀង ទីតាំងកែច្នៃសំរាម និងការសាងសង់ទីលានចាក់សំរាមនៅតាមទីក្រុង និងទីប្រជុំជននៅបណ្ដាខេត្តសំខាន់ៗមួយចំនួន រួម​ទាំង​ការ​កសាង​សមត្ថភាព​ធនធាន​មនុស្ស​ជា​ដើម​ ដើម្បីចូ​ល​រួម​ចំណែក​យ៉ាងសំខាន់​ក្នុង​ការ​ជំរុញ​ការ​អភិវឌ្ឍ​វិស័យ​សេដ្ឋកិច្ច​សង្គម​នៅ​កម្ពុជា​។ ឆ្លៀត​ក្នុង​ឱកាសនោះ ឯកឧត្តមទេសរដ្ឋមន្ត្រី បានផ្តាំផ្ញើដល់ក្រុមហ៊ុនសាងសង់ និងអង្គ​ភាព​គ្រប់​គ្រង​គម្រោង​អនុវត្តការងារឱ្យបានត្រឹមត្រូវ និងសម្រេចជោគជ័យ ប្រកបដោយគុណភាព និង​ប្រសិទ្ធ​ភាព ព្រមទាំងស្នើដល់ប្រជាពលរដ្ឋ ដែលមានផ្ទះសម្បែងនៅជិតការដ្ឋានសាងសង់ ឬ​ទទួល​រង​ផលប៉ះពាល់ដោយសារគម្រោងអភិវឌ្ឍន៍នេះ សូមមេត្តាយោគយល់ និងអធ្យាស្រ័យខ្ពស់ ដើម្បី​ជំរុញឱ្យការដ្ឋានសាងសង់អាចដំណើរការបានរលូន និងបញ្ចប់តាមផែនការគ្រោងទុក។

ឯកឧត្ដមអគ្គបណ្ឌិតសភាចារ្យឧបនាយករដ្ឋមន្ត្រី បានថ្លែងកោតសរសើរ និង​វាយ​តម្លៃ​ខ្ពស់​ចំពោះ​ក្រសួង​សាធារណការ និងដឹកជញ្ជូន ដែលបានខិតខំប្រឹងប្រែង និងយក​ចិត្ត​ទុក​ដាក់​ខ្ពស់​ក្នុង​ការ​អភិវឌ្ឍ​វិស័យ​ហេដ្ឋារចនាសម្ព័ន្ធផ្លូវ-ស្ពាន ស្របតាមកម្មវិធីនយោបាយ និងយុទ្ធសាស្ត្រ​ចតុកោណ​របស់​រាជ​រដ្ឋាភិបាល ដោយសម្រេចបាននូវសមិទ្ធផលការងារសំខាន់ៗ ជាច្រើន​តាម​រយៈ​ការ​ដាក់​ឱ្យដំណើរ​ការ ការប្រកាសសម្ពោធជាផ្លូវការ និងបើកការដ្ឋានជាច្រើន ហើយផ្លូវ​នេះ​គឺ​ជា​ចំណង​ដៃ​ថ្មី​មួយ​ទៀត​ សម្រាប់បងប្អូន ប្រជាពលរដ្ឋរស់នៅខេត្តកណ្ដាល ដើម្បីជួយ​សម្រួល​ដល់​ការ​ធ្វើ​ដំណើរ​ប្រចាំ​ថ្ងៃ និងការដឹកជញ្ជូនផ្សេងៗ ដែលនេះជាការឆ្លុះ​បញ្ចាំង​អំ​ពីកា​រ​អភិវឌ្ឍ​ទៅមុ​ខ​ឥត​ឈប់​ឈរ​នៃ​វិស័យហេដ្ឋារចនាសម្ព័ន្ធផ្លូវ-ស្ពាន និងការតភ្ជាប់ប្រ​ទាក់​ក្រឡា​ទៅ​ដល់​គ្រប់​ទីកន្លែង​នៅ​​ក្នុងប្រទេសកម្ពុជា។

សូមជម្រាបថា កំណាត់ផ្លូវជាតិលេខ២៣នេះ គឺជាខ្សែផ្លូវដ៏មានសក្តានុពល និងមាន​ភាព​ប្រទាក់​ក្រឡា តភ្ជាប់ជាមួយផ្លូវជាតិលេខ២១B និងផ្លូវជាតិលេខ២១ ឆ្ពោះទៅ​កាន់​ទិសដៅ​រាជ​ធានី​ភ្នំពេញ និងព្រំដែនកម្ពុជា-វៀតណាម ជ្រៃធំ-ឡុងប៊ិញ និងតភ្ជាប់ជាមួយផ្លូវជាតិលេខ១៤ ទិស​ដៅ​អ្នក​លឿង ខេត្តព្រៃវែង និងព្រំដែនកម្ពុជា-វៀតណាម ក្អមសំណ-វិញសឿង និង​តភ្ជាប់​ជាមួយ​បណ្តាញ​ខ្សែ​ផ្លូវផ្សេងៗដទៃទៀតនៅក្នុងតំបន់នោះ។ គម្រោងនេះនឹងត្រូវស្ថាបនាជា ២គន្លងទៅ និង២​គន្លងមក ដោយពង្រីកទទឹងតួផ្លូវប្រវែង ១១ម៉ែត្រ និងក្រាលកៅស៊ូ AC កម្រាស់ ៨សង់​ទី​ម៉ែត្រ លើទទឹងតួផ្លូវប្រវែង ១០ម៉ែត្រ។ ជាមួយគ្នានេះ គម្រោងក៏នឹងស្ថាបនាផងដែរនូវស្ពានចំនួន ៤កន្លែង លូមូលកាត់ទទឹងផ្លូវចំនួន ៣៣កន្លែង លូប្រអប់កាត់ទទឹងផ្លូវចំនួន ១៧កន្លែង និងលូមូល​អមសងខាងផ្លូវប្រវែង ១ ៥៥៨ម៉ែត្រ ព្រមទាំងការបំពាក់ផ្លាកសញ្ញា គំនូសសញ្ញា បង្គោល​គីឡូម៉ែត្រ និងបង្គោលសុវត្ថិភាពទៅតាមបទដ្ឋានបច្ចេកទេសផ្លូវថ្នល់ និងសាង​សង់​ដោយ​ក្រុមហ៊ុន Heng Sambat Co., Ltd Import Export Transportation and Construction ប្រើប្រាស់​រយៈពេលសាងសង់ចំនួន ២៤ខែ និងរយៈពេលថែទាំចំនួន ៣៦ខែ និងប្រើប្រាស់​ថវិកា​ដែល​ជា​ឥណទាន​សម្បទានរបស់ធនាគារអភិវឌ្ឍន៍អាស៊ី សរុបប្រមាណ ២១,៦៨​លាន​ដុល្លារ​អាមេរិក សម្រាប់ការសាងសង់ ការបោសសម្អាតគ្រាប់មីនយុទ្ធភ័ណ្ឌមិនទាន់ផ្ទុះ និង​ពន្ធអាករ​ផ្សេងៗ រួមជាមួយ​នឹង​ថវិកា​បដិភាគ​របស់​រាជរដ្ឋាភិបាល​សម្រាប់​ការ​ដោះ​ស្រាយ​ផល​ប៉ះ​ពាល់​ផង​ដែរ​៕ អត្ថបទ៖ ប្រាក់ វ៉ាន់ដា