ភ្នំពេញ៖ ធនាគារជាតិនៃកម្ពុជា នឹងដាក់ដំណើរការនូវការទូទាត់ឆ្លងដែនជាមួយប្រទេសវៀតណាម និងប្រទេសឡាវ តាមរយៈប្រព័ន្ធបាគង ដើម្បីជំរុញការប្រើប្រាស់ប្រាក់រៀល ឱ្យកាន់តែមានទំហំច្រើននៅក្នុងចរន្តសេដ្ឋកិច្ច។

លោកជំទាវ ជា សិរី ទេសាភិបាលរងធនាគារនៃកម្ពុជា មានប្រសាសន៍ថា ការគ្រោងពង្រីក​ប្រព័ន្ធទូទាត់​ឆ្លងដែនជាមួយប្រទេសឡាវ និងវៀតណាម គឺ​បន្ទាប់ពីកម្ពុជាទទួល​បានជោគជ័យ​នូវការទូទាត់ឆ្លងដែនជាមួយប្រទេសថៃ។

បច្ចុប្បន្ន ប្រព័ន្ធបាគង (Bakong)របស់ធនាគារជាតិនៃកម្ពុជា ​បានអនុញ្ញាតឱ្យ​ពលរដ្ឋផ្ទេរប្រាក់ទៅ​កាន់​ធនាគារបានទាំងអស់នៅកម្ពុជាដោយងាយស្រួល​ និងរហ័ស។ ជាពិសេសពលរដ្ឋដែលប្រើប្រព័ន្ធនេះ​ គឺអាចចាយវាយប្រាក់រៀលនៅក្នុងប្រទេសថៃ បានថែមទៀត​​ តាមរយៈការស្កេន QR Code​ ។

កម្ពុជា​ និងថៃ ​ដាក់ឲ្យប្រើប្រាស់​នូវ​ប្រព័ន្ធប្រតិបត្តិការទូទាត់ឆ្លងដែន ​តាមរយៈការស្កេន QR Code បានជាងរយៈពេល៣ឆ្នាំហើយ ​ពោលចាប់ពីខែកុម្ភៈ ​ឆ្នាំ២០២០ មក។​​ គិតត្រឹមដើមខែមិថុនា ឆ្នាំ២០២៣ ​ការទូទាត់ឆ្លងដែនរវាងកម្ពុជា​-ថៃ​ គឺ​សម្រេចបានទឹកប្រាក់ជាង ៣០០០លានរៀល៕ ​​អត្ថបទ៖ វណ្ណៈ