ភ្នំពេញ៖ ពលរដ្ឋរស់នៅរាជធានីភ្នំពេញ បានសម្ដែងនូវការគាំទ្រចំពោះអនុក្រឹត្រ ស្តីពីការ​បន្តសុពលភាព​អត្តសញ្ញាណបណ្ណសញ្ជាតិខ្មែរគំរូថ្មី ដែលផុតសុពលភាពប្រាស់​ក្នុងឆ្នាំ២០២២ និងឆ្នាំ២០២៣ អាចប្រើប្រាស់ ជា​ឯកសារសម្រាប់ការបោះឆ្នោតជ្រើសតាំងតំណាងរាស្ត្រ​នីតិកាលទី៧បាន គឺជួយបង្កលក្ខណៈងាយ ស្រួលច្រើនដល់ពួកគេ សម្រាប់ការបោះឆ្នោត​នៅពេលខាងមុខនេះ ។

លើសពីនេះ ពួកគាត់បន្តថា ការបោះឆ្នោតមានសារៈសំខាន់ណាស់ដើម្បីជ្រើសរើសថ្នាក់ដឹក​ដែល​មាន​សមត្ថភាពដឹកនាំរាជរដ្ឋាភិបាល​ និងគិតគូរពីសុខទុក្ខប្រជាពលរដ្ឋ ​និងប្រទេសជាតិ ដូច្នេះនៅថ្ងៃទី២៣ ខែកក្កដាខាងមុខនេះ នឹងទៅចូលបោះឆ្នោត។ ​លើសពីនេះ ពួកគាត់បង្ហាញ​ការគាំទ្រគណបក្សប្រជាជនកម្ពុជា ឱ្យបន្តដឹកនាំរាជរដ្ឋាភិបាលផងដែរ។

ការបោះឆ្នោតជ្រើសតាំងតំណាងរាស្រ្ត នីតិកាលទី៧ នឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ចាប់ពីម៉ោង ៧:០០ព្រឹក រហូតដល់ម៉ោង ៣:០០រសៀល។ ដើម្បីបោះឆ្នោតបាន​ប្រជាពលរដ្ឋខ្មែរ​ត្រូវមានឈ្មោះក្នុងបញ្ជីបោះឆ្នោត និងត្រូវមានអត្តសញ្ញាណ-ប័ណ្ណសញ្ជាតិខ្មែរ​មានសុពលភាព (អ.ខ) ឬឯកសារបញ្ជាក់អត្តសញ្ញាណបម្រើឱ្យការបោះឆ្នោត (ឯ.អ)។

ឯកសារបញ្ជាក់អត្តសញ្ញាណបម្រើឱ្យការបោះឆ្នោត ធ្វើជូនប្រជាពលរដ្ឋក្នុងរយៈពេល ៣០ថ្ងៃ ពោលចាប់ពីថ្ងៃទី២២ ខែមិថុនា ​ដល់ថ្ងៃទី២១ ខែកក្កដា ឆ្នាំ២០២៣ ​នៅគណៈកម្មការឃុំ សង្កាត់រៀបចំការបោះឆ្នោត និងត្រូវបញ្ជាក់សុពលភាពដោយអាជ្ញាធរឃុំ ​សង្កាត់ ដែលសាមីខ្លួនមានឈ្មោះក្នុងបញ្ជីបោះឆ្នោតផ្លូវការ និងត្រូវបោះឆ្នោត៕ អត្ថបទ៖ទូច សោភ័ណ