ស៊ីហ្គេម៖ លោក ហ៊ុន បូរី អគ្គលេខាធិការសហព័ន្ធខ្មែរកីឡាអត្តពលកម្មស្ម័គ្រចិត្ត បានបញ្ជាក់ថា ដោយទទួលបានគោលការណ៍ពីក្រសួងអប់រំ យុវជន និងកីឡា សហព័ន្ធកំពុងធ្វើការប្រមូលផ្ដុំក្រុមជម្រើសជាតិ ដែលមានកីឡាករ-កីឡាការិនីសរុបចំនួន ២៧នាក់ដើម្បីត្រៀមការប្រកួតកីឡាស៊ីហ្គេមលើកទី៣១ ឆ្នាំ២០២១ នៅរដ្ឋធានីហាណូយ ប្រទេសវៀតណាមនាខែវិច្ឆិកាខាងមុខ។
ប៉ុន្តែក្នុងចំណោមកីឡាករ-កីឡាការិនីជម្រើសជាតិទាំងអស់ នៅមិនទាន់ច្បាស់បានទៅ ឬអត់នោះទេ ដ្បិតស៊ីហ្គេមឆ្នាំនេះម្ចាស់ផ្ទះបានកំណត់វិញ្ញាសាប្រកួតសរុប ៤៧វិញ្ញាសា។ ដូច្នេះកីឡាករ-កីឡាការិនីម្នាក់ៗ ត្រូវឆ្លងកាត់ការវាយតម្លៃសមត្ថភាពជាមុនសិន បើពួកគេសម្រេចបានថេរវេលាដែលអាចប្រកួតប្រជែង ឬប្រហាក់ប្រហែលអាចឈានចូលជុំផ្ដាច់ព្រ័ត្រ ទើបសហព័ន្ធបញ្ជូនទៅ។ គួរបញ្ជាក់ថា កីឡាអត្តពលកម្មគឺជាប្រភេទកីឡា ដែលមានវិញ្ញាសាប្រកួតច្រើនជាងគេក្នុងចំណោមកីឡា ៤០ប្រភេទដែលវៀតណាមបានដាក់ឲ្យប្រកួត ក្នុងព្រឹត្តិការណ៍ស៊ីហ្គេមនាចុងឆ្នាំ២០២១។ ប៉ុន្ដែសហព័ន្ធខ្មែរកីឡាអត្តពលកម្មស្ម័គ្រចិត្ត នៅមិនទាន់កំណត់អត្តពលិកត្រូវបញ្ជូនទៅចូលរួមនោះទេ។
យ៉ាងណាមិញបច្ចុប្បន្នកីឡាករ-កីឡាការិនីទាំងអស់ កំពុងហ្វឹកហាត់យ៉ាងយកចិត្តទុកដាក់ ដើម្បីមានឱកាសចូលរួមព្រឹត្តិការណ៍កីឡាប្រចាំតំបន់ ២ឆ្នាំម្ដងនេះ។ ចំពោះកាលបរិច្ឆេទនៃការប្រកួតកីឡាស៊ីហ្គេមលើកទី៣១ នៅរដ្ឋធានីហាណូយនេះគ្រោងប្រកួតពីថ្ងៃទី២១ ខែវិច្ឆិកា រហូតដល់ថ្ងៃទី២ ខែធ្នូ ក្នុងនោះកម្ពុជាក៏គ្រោងបញ្ជូនអត្តពលិកសរុប ៣២ប្រភេទកីឡាទៅចូលរួមប្រកួតផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
