មនុស្ស ៩នាក់ ដែលរួមទាំងម្ចាស់ហាងដែរនោះ ត្រូវបានចាប់ខ្លួន ហើយហេតុការណ៍ផ្ទុះហ្គាសក្នុងហាងលក់សាច់អាំងយីហោ Fuyang Barbecue កាលពីយប់ថ្ងៃពុធនៅតំបន់ភាគពាយ័ព្យ Ningxia (នីងសៀ) ប្រទេសចិន បណ្តាលឲ្យមនុស្សស្លាប់មនុស្ស ៣១នាក់ និងបង្ខំឲ្យលោកប្រធានាធិបតី Xi Jinping ចេញបទបញ្ជាពិនិត្យសុវត្ថិភាពតឹងរឹងជាងមុន ។ 

សារព័ត៌មានក្នុងស្រុក រាយការណ៍ថា សិស្សវិទ្យាល័យជាច្រើននាក់ រួមទាំងនិវត្តន៍ជន ស្ថិតនៅក្នុងចំណោមអ្នកស្លាប់ ។ 

សារព័ត៌មានរដ្ឋស៊ីនសួ រាយការណ៍នៅថ្ងៃព្រហស្បតិ៍នេះថា ហេតុការណ៍ផ្ទុះហ្គាសក្នុងទីក្រុង Yinchuan រដ្ឋធានីតំបន់ Ningxia បណ្តាលមកពីធ្លាយធុងហ្គាសនៅក្នុងហាង ។ 

សារព័ត៌មានស៊ីនហួ រាយការណ៍ទៀតថា មនុស្ស ៧នាក់ កំពុងទទួលការព្យាយាលស្នាមរលាក និងរយះសាច់ដោយសារបែកកែវ ។ 

ហេតុការណ៍ផ្ទុះហ្គាសនេះ បានកើតឡើងរយៈពេល ១ថ្ងៃមុនពេលពិធីបុណ្យទូកនាគរយៈពេល ៣ ថ្ងៃ នៅប្រទេសចិន ពេលដែលក្រុមគ្រួសារ និងមិត្តភ័ក្តិ ជួបជុំគ្នាទទួលទានអាហារ ។

 ដោយឡែក ទូរទស្សន៍រដ្ឋចិន CCTV រាយការណ៍ថា លោកប្រធានាធិបតី Xi បាននិយាយប្រាប់ក្រុមអាជ្ញាធរឲ្យចេញប្រតិបត្តិការភ្លាមៗ ដើម្បីព្យាបាលអ្នករងរបួស ហើយលោកនិយាយថា ការត្រួតពិនិត្យសុវត្ថិភាពនៅតាមឧស្សាហកម្មធំៗ និងតាមវិស័យធុរកិច្ច គួរតែត្រូវបានពង្រឹង ។ 

សូមបញ្ជាក់ថា ឧបទ្ទេវហេតុផ្ទុះហ្គាស និងសារធាតុគីមី មិនមែនជារឿងចម្លែកនោះទេនៅក្នុងប្រទេសចិន បើទោះបីជាមានការព្យាយាមធ្វើឲ្យល្អប្រសើរសុវត្ថិភាពក៏ដោយ ។ 

ជាក់ស្តែងកាលពីឆ្នាំ ២០១៥កន្លងទៅ ហេតុការណ៍ផ្ទុះជាច្រើនលើកនៅទីក្រុងកំពង់ផែភាគខាងជើង Tianjin បានសម្លាប់មនុស្ស ១៧៣នាក់ ៕