នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយនៅក្នុងសេចក្តីថ្លែងការណ៍កាលពីថ្ងៃពុធថា លោកនឹងពុំអាចទទួលយកបានឡើយអំពើហិង្សាណាមួយ ក្រោយអំពើកុបកម្ម និងការប៉ះទង្គិចគ្នាកើតមាននៅតំបន់ Golan Heights និងនៅតំបន់កាន់កាប់វ៉េសប៊ែង ហើយលោកសូមផ្តល់ការគាំទ្រយ៉ាងពេញទំហឹងដល់កងកម្លាំងនគរបាលអ៊ីស្រាអែល និងកម្លាំងសន្តិសុខ ។
នៅតំបន់កាន់កាប់ Golan Heights ហ្វូងមនុស្សប្រុសរាប់រយនាក់មកពីភូមិ Druze Arabបាននាំគ្នាតវ៉ាប្រឆាំងនឹងផែនការរបស់អ៊ីស្រាអែល បង្កើតកសិដ្ឋានខ្យល់ ដោយពួកគេមួយចំនួន ប្រឈមជាមួយក្រុមនគរបាលបង្ក្រាបកុបកម្មនៅក្នុងការតតាំងហិង្សាខុសធម្មតាមួយដែលធ្វើឲ្យមនុស្សជាច្រើននាក់រងរបួស ។
ដោយឡែកនៅឯតំបន់វ៉េសប៊ែងវិញ ក្រុមតាំងលំនៅនិគមន៍ជនអ៊ីស្រាអែល បានសម្រុកចូលទីក្រុងប៉ាឡេស្ទីនជាច្រើន ដោយបានសម្លាប់មនុស្សម្នាក់ និងដុតអគារ និងរថយន្ត ដើម្បីជាការសងសឹកការសម្លាប់ពលរដ្ឋអ៊ីស្រាអែល ៤នាក់ ដោយក្រុមអ៊ីស្លាមហាម៉ាស់ នៅជិតសំណង់និគមន៍ជនកាលពីរយៈពេល ១ថ្ងៃមុន ។
លោក Netanyahu និយាយនៅក្នុងសេចក្តីថ្លែងការណ៍ថា ពួកយើងពុំអាចទទួលយកបានឡើយការបង្កហេតុណាមួយមកលើក្រុមនគរបាល ឬកងកម្លាំងសន្តិសុខអ៊ីស្រាអែល នៅតាមទីកន្លែងទាំងអស់នេះ ឬកន្លែងផ្សេងទៀត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
