កីឡាករវាយកូនបាល់អេស្ប៉ាញ Carlos Alcaraz ហាក់មានជំនឿ ចិត្តមកវិញ​ក្រោយ​យក​ឈ្នះ​កីឡាករ​ឆែក Jiri Lehecka ឡើងវគ្គ ៨ នាក់ចុងក្រោយនៃព្រឹត្តិការណ៍វាយកូនបាល់ Cinch Championship នៅក្លិបវាយកូនបាល់ Queen ចក្រភពអង់គ្លេស។

មិនខុសពី Nadal ទេ Carlos Alcaraz ជាកីឡាករដែលមានជំនាញនៅលើទីលានដីក្រហម ខណៈ​ការប្រកួតនៅលើទីលានវាលស្មើមិនសូវជាជោគជ័យទេ។

យ៉ាងណាក្តីការប្រកួតនៅថ្ងៃព្រហស្បតិ៍ម្សិលមិញ Carlos Alcaraz បានយកឈ្នះ Jiri Lehecka ២ សិតផ្ទួនៗ ៦-២ និង ៦-៣។

រំលឹកដែរថា Carlos Alcaraz បានរងបរាជ័យនៅវគ្គពាក់កណ្តាលផ្តាច់ព្រ័ត្រ Grand Slam, French Open កាលសប្តាហ៍មុនក្រោយចាញ់ក្រោមស្នាដៃកីឡាករលេខ ១ ពិភពលោក Novak Djokovic។

ងាកមកកីឡាករប៊ុលហ្ការី Grigor Dimitrov អតីតលេខ ៣ ពិភពលោកក៏​រក​បាន​ជ័យជំនះ​ដែរ​លើ​កីឡាករ​អាហ្សង់ទីន Francisco Cerundolo ៦-៣ និង ៧-៥ ដើម្បីឡើងវគ្គ ៨ នាក់ចុងក្រោយ​ជួប​ជាមួយ Carlos Alcaraz៕ អត្ថបទ៖នាង សុភាវុធ