សភាជប៉ុន ទទួលបានរបាយការណ៍រង់ចាំជាយូរបង្ហាញថា មនុស្សប្រហែល ២៥.០០០នាក់ ត្រូវបានគេធ្វើឲ្យលែងមានបុត្រ ក្រោមច្បាប់អត្រាកំណើតខ្ពស់កាលពីមុនរបស់ប្រទេសជប៉ុន ក្នុងនោះ ២ភាគ៣នៃនីតិវិធីធ្វើឡើងដោយគ្មានការយល់ព្រមពីសាមីខ្លួននោះទេ ។  

សារព័ត៌មានក្នុងស្រុក រាយការណ៍ថា ក្មេងៗដែលមានអាយុត្រឹម ៩ឆ្នាំ ក៏ស្ថិតនៅក្នុងចំណោមមនុស្សដែលត្រូវបានគេធ្វើឲ្យលែងមានបុត្រ។ ប្រធានសភាទាំង ២អង្គ ត្រូវបានគេបង្ហាញច្បាប់ចម្លងរបាយការណ៍ ១.៤០០ទំព័រ។

លោក Hidehisa Otsuji ដែលជាប្រធានព្រឹទ្ធសភា និយាយពេលទទួលរបាយការណ៍នេះថា លោកយល់ឃើញថា ម្នាក់ៗ និងអ្នករាល់គ្នាត្រូវតែយល់ខ្លឹមសាររបាយការណ៍ឲ្យបានច្បាស់ ដើម្បីកុំឲ្យស្ថានភាពបែបនេះបន្តកើតឡើង និងកើតឡើងច្រំដែលទៀត។

លោក Hirokazu Matsuno គឺជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជប៉ុន និយាយថា រដ្ឋាភិបាលនឹងគិតគូដោយប្រុងប្រយ័ត្ន និងសុំទោស​ចំពោះការ​ពិតដែលថា​មនុស្សជាច្រើន​នាក់ ត្រូវបានបង្ខំឲ្យទទួលការវះកាត់ធ្វើឲ្យលែងមានបុត្រ។

គួរឲ្យដឹងថា កាលពីឆ្នាំ ២០១៩ ជប៉ុនបានអនុម័តច្បាប់សងជំងឺចិត្តដល់អ្នកទាំងឡាយណា ដែលត្រូវបានគេធ្វើឲ្យលែងមាន​បុត្រក្រោមច្បាប់ការពារអត្រា​កំណើត​ខ្ពស់​របស់ប្រទេសមួយនេះ ដើម្បីការពារការផ្តល់កំណើតរបស់កូនចៅជំនាន់ក្រោយ ។ កម្មវិធីធ្វើឲ្យលែងមានបុត្រ បានចូលជាធរមាន ចាប់ពីឆ្នាំ ១៩៤៨រហូតដល់ ឆ្នាំ១៩៩៦៕