កាណាដា ៖ មន្ត្រីសុវត្ថិភាពប្រទេសកាណាដា កាលពីថ្ងៃសុក្របានបើកការស៊ើបអង្កេតលើការផ្ទុះ

នៅបាតសមុទ្រ​នៃ​នាវាមុជទឹកទេសចរណ៍ដែលបានបណ្តាលឲ្យមនុស្សទាំង៥ នាក់នៅក្នុងនាវា​

នោះស្លាប់ទាំងអស់ ខណៈពេល​កំពុងមុជទឹកទៅកាន់បំណែកនៃនាវាទីតានិកដែលមានអាយុកាល​មួយសតវត្សដោយបង្កើតជាសំណួរជាច្រើនអំពីបរិស្ថានដែលមិនអាចគ្រប់គ្រង​បាននៃបេសកកម្មបែបនេះ។

កម្ទេចកម្ទី ពីនាវាមុជទឹក Titan ត្រូវបានរក​ឃើញ​នៅ​បាតសមុទ្រអាត្លង់ទិកខាងជើងកាលពីថ្ងៃព្រហស្បតិ៍​ដោយយានមុជទឹកយន្ត ដែលត្រូវបាន​ដាក់ពង្រាយ​ពីនាវាស្វែង​រករបស់ប្រទេសកាណាដា ដោយបាន​បញ្ចប់កិច្ចខិតខំប្រឹងប្រែងជួយសង្គ្រោះអន្តរជាតិរយៈពេលប្រាំថ្ងៃដ៏តានតឹង។ លោកឧត្តមនាវីឯក John Mauger បាននិយាយថា បំណែកនៃនាវា Titan ដែលបានបាត់បង់ការ​ទាក់ទង​ជាមួយ​នាវាជំនួយលើផ្ទៃទឹករបស់វា ប្រហែលមួយម៉ោង និង ៤៥ នាទីក្នុងការចុះមុជក្នុងទឹកទៅរយៈពេល ២ ម៉ោងកាល​ពីថ្ងៃអាទិត្យ ដែលបានបែកនៅក្នុងបាតសមុទ្រប្រហែល៤៨៨ ម៉ែត្រ ពីក្បាលនៃនាវាទីតានិក ប្រមាណ៤គីឡូ​ម៉ែត្រ​នៅក្រោមផ្ទៃទឹក។ មនុស្សទាំងប្រាំនាក់ ដែលបានស្លាប់រួមមានលោក Stockton Rush ស្ថាបនិក និងជានាយក​ប្រតិបត្តិ​នៃ​ក្រុមហ៊ុន OceanGate Expeditions មានមូលដ្ឋាននៅសហរដ្ឋអាមេរិក ដែលធ្វើប្រតិបត្តិការ​នាវាមុជទឹក និងយកប្រាក់ចំនួន ២៥០.០០០ ដុល្លារក្នុងមនុស្សម្នាក់ ដើម្បីធ្វើដំណើរ​ទៅកាន់នាវាទីតានិច។ អ្នកផ្សេងទៀតគឺជាមហាសេដ្ឋីជនជាតិអង់គ្លេសនិងជាអ្នករុករកគឺលោក Hamish Harding អាយុ ៥៨ ឆ្នាំ និង​ពាណិជ្ជករ​ដើមកំណើតប៉ាគីស្ថាន លោក Shahzada Dawood អាយុ ៤៨ ឆ្នាំនិងកូនប្រុសអាយុ ១៩ ឆ្នាំរបស់លោក ឈ្មោះ Suleman ទាំងពីអ្នកជាពលរដ្ឋអង់គ្លេស ព្រមទាំងអ្នកស្រាវជ្រាវសមុទ្រជនជាតិបារាំងលោក Paul-Henri Nargeolet មានអាយុ ៧៧ឆ្នាំ។

លោក Nargeolet គឺជាអ្នកជំនាញឈានមុខម្នាក់លើនាវាទីតានិច ជានាវាប្រណិតរបស់​អង់គ្លេសដែលបាន​បុកផ្ទាំងទឹកកក ហើយបានលិចក្នុងការធ្វើដំណើរលើកដំបូងរបស់ខ្លួនក្នុងខែ​មេសា ឆ្នាំ ១៩១២ បណ្តាលឲ្យមនុស្សជាង ១,៥០០ នាក់នៅលើនាវាស្លាប់។