អាមេរិក ៖ រដ្ឋមន្ត្រីក្រសួងយុត្តិធម៌សហរដ្ឋអាមេរិកលោក Merrick Garland កាលពីថ្ងៃសុក្រ (ទី២៣ ខែមិថុនា) បានបដិសេធការចោទប្រកាន់របស់អង្គភាពផ្ដល់ព័ត៌មានអំពីសេវាកម្មចំណូលផ្ទៃក្នុង (Internal Revenue Service) ដែលបាននិយាយថា រដ្ឋអាជ្ញាសហព័ន្ធជាន់ខ្ពស់ ដែលមានភារកិច្ចស៊ើបអង្កេតករណីកូន​ប្រុសរបស់​លោក​ប្រធានាធិបតី Joe Biden គឺលោក Hunter ត្រូវបានរារាំងដោយក្រសួងយុត្តិធម៌ ក្នុងការបន្តចាត់វិធានការ​ព្រហ្មទណ្ឌកាន់តែធ្ងន់ធ្ងរបន្ថែមទៀត។

ដោយនិយាយជាសាធារណៈជាលើកដំបូងចាប់តាំងពីលោក Hunter Biden ត្រូវបានចោទប្រកាន់ពីបទឧក្រិដ្ឋ កាលពីថ្ងៃអង្គារ (ទី២០ ខែមិថុនា) សម្រាប់បទមជ្ឈិមចំនួនពីរករណីពាក់ព័ន្ធនឹងការខកខាន​បង់ពន្ធលើ​ប្រាក់ចំណូលដោយចេតនានោះ លោក Garland បាននិយាយនៅក្នុងសន្និសីទសារព័ត៌មានថា រដ្ឋអាជ្ញា​អាមេរិកលោក David Weiss ដែលជារដ្ឋអាជ្ញាជាន់ខ្ពស់សហព័ន្ធ នៅរដ្ឋ Delaware «ត្រូវបានផ្តល់សិទ្ធិ​អំណាចយ៉ាងពេញលេញ» ដើម្បីធ្វើការសម្រេចការចោទប្រកាន់ដោយផ្ទាល់។

លោក Garland បានប្រាប់ថា៖ «លោក David Weiss ត្រូវបានតែងតាំងដោយអតីតប្រធានាធិបតីលោក Donald Trump ជារដ្ឋអាជ្ញារបស់សហរដ្ឋអាមេរិកនៅរដ្ឋ Delaware ហើយលោកបានចាត់ចែងករណីនេះ អំឡុងរដ្ឋបាលមុន។ លោកត្រូវបានផ្តល់សិទ្ធិអំណាចយ៉ាងពេញលេញ ដើម្បីធ្វើការសម្រេចទាំងអស់ដោយផ្ទាល់»។

ការិយាល័យរបស់លោក Weiss កាលពីថ្ងៃអង្គារ (ទី២០ ខែមិថុនា) បានបង្ហាញនៅក្នុងឯកសារតុលាការថាលោក Hunter Biden បានយល់ព្រមផ្តល់ចម្លើយពីភាពមានទោស ចំពោះការចោទប្រកាន់បទមជ្ឈិមករណីបង់ពន្ធចំនួនពីរ ហើយជនជាប់ចោទ ក៏បានយល់ព្រមចូលទៅក្នុងកម្មវិធីបង្វែរការកាត់ទោសទុកជាមុន ដើម្បីជៀសវាងការ​ប្រឈមនឹងបទឧក្រិដ្ឋធ្ងន់ធ្ងរជាងនេះ ពាក់ព័ន្ធនឹងការកាន់កាប់អាវុធ ខណៈដែលកំពុងប្រើប្រាស់ញៀនថ្នាំ។

កាលពីថ្ងៃព្រហស្បតិ៍ (ទី២២ ខែមិថុនា) សមាជិកសភានៅក្នុងសភាតំណាងរាស្រ្តសហរដ្ឋអាមេរិក បានចេញ​ផ្សាយប្រតិចារិកនៃបទសម្ភាសន៍ជាមួយលោក Gary Shapley ភ្នាក់ងារត្រួតពិនិត្យឧក្រិដ្ឋកម្ម​របស់អង្គភាព​ផ្ដល់ព័ត៌មានអំពីសេវាកម្មចំណូលផ្ទៃក្នុង (IRS) ដែលធ្វើការលើការស៊ើបអង្កេត Hunter Biden។ លោក Shapley បានប្រាប់ថា ក្រសួងយុត្តិធម៌បានដំណើរការយឺតយ៉ាវលើករណីនេះ ដែលចាប់ផ្តើមក្នុងរដ្ឋបាលរបស់លោក Trump និងបន្តរហូតដល់អាណត្តិរបស់លោក Garland៕