អេស្ប៉ាញ ៖ អង្គការលើកលែងទោសអន្តរជាតិ (Amnesty International) កាលពីថ្ងៃសុក្រ (ទី២៣ ខែមិថុនា) បានចោទប្រកាន់ប្រទេសអេស្ប៉ាញ និងម៉ារ៉ុកថា បានបិទបាំងព័ត៌មានក្នុងការដែលមិន​បានស៊ើបអង្កេត​ព្រឹត្តិការណ៍ឲ្យបានត្រឹមត្រូវ នៅព្រំដែននៃតំបន់ទឹកដីដាច់ឆ្ងាយពីមាតុភូមិ Melilla របស់អេស្ប៉ាញ កាលពីឆ្នាំមុន នៅពេលដែលជនអន្តោប្រវេសន៍ និងជនភៀសខ្លួនរាប់សិបនាក់ បានស្លាប់ ពេលពួកគេព្យាយាមឆ្លងដែន ក្នុងទ្រង់ទ្រាយធំ។

កាលពីថ្ងៃទី២៤ ខែមិថុនា ឆ្នាំ២០២២ ជនអន្តោប្រវេសន៍ និងជនភៀសខ្លួនអាហ្វ្រិក នៅអនុតំបន់សាហារ៉ាប្រមាណជា ២.០០០នាក់ បានព្យាយាមឆ្លងចូលទៅក្នុងដែនដីអាហ្វ្រិកខាងជើងរបស់ប្រទេសអេស្ប៉ាញ ដោយចាកចេញពី​ប្រទេសម៉ារ៉ុក។ អង្គការមិនមែនរដ្ឋាភិបាល (NGO) បានឲ្យដឹងថា យ៉ាងហោចណាស់មនុស្ស ៣៧នាក់ បានបាត់បង់ជីវិត និងយ៉ាងហោចណាស់ ៧៦នាក់ នៅកំពុងបាត់ខ្លួន។

ប្រទេសម៉ារ៉ុក បានឲ្យដឹងថា មនុស្ស ២៣នាក់ បានស្លាប់ នៅក្នុងការហេតុការណ៍ណពារលើ ឬជាន់លើគ្នា នៅពេល​ដែលជនអន្តប្រវេសន៍ទាំងនោះ បានធ្លាក់ពីជញ្ជាំងរបង រីឯប្រទេសអេស្ប៉ាញបាននិយាយថា គ្មានការស្លាប់​ណាមួយ កើតមាននៅលើទឹកដីរបស់ខ្លួននោះឡើយ។

អគ្គលេខាធិការអង្គការលើកលែងទោសអន្តរជាតិ លោក Agnes Callamard បាននិយាយថា៖ «មួយឆ្នាំក្រោយពីការ​ស្លាប់រង្គាលនៅទឹកដី Melilla អាជ្ញាធររបស់ប្រទេសអេស្ប៉ាញ និងម៉ារ៉ុក មិនត្រឹមតែបន្តបដិសេធការ​ទទួលខុសត្រូវ​ណាមួយនោះទេ ប៉ុន្តែថែមទាំងកំពុងរារាំងដល់ការប៉ុនប៉ង ក្នុងការស្វែងរកការពិតទៀតផង»។

យ៉ាងណាក្ដី អគ្គរដ្ឋអាជ្ញារបស់ប្រទេសអេស្ប៉ាញ បានស៊ើបអង្កេតហេតុការណ៍នៅទីក្រុងស្វយ័ត Melilla នេះ ប៉ុន្តែបានបដិសេធមិនចោទប្រកាន់មន្រ្តីអេស្ប៉ាញ ដែលបាននិយាយថា មិនបានដឹងពីគ្រោះថ្នាក់ ដែលបណ្ដាល​ឲ្យមានអ្នកបាត់បង់ជីវិតនេះ។ សមាជិកសភាអេស្ប៉ាញបានច្រានចោលការអំពាវនាវឲ្យមានការស៊ើបអង្កេតសភា។

អ្នកនាំពាក្យក្រសួងមហាផ្ទៃអេស្ប៉ាញ បាននិយាយថា ការស៊ើបអង្កេតដោយអគ្គរដ្ឋរបស់ប្រទេស​អេស្ប៉ាញត្រូវបានធ្វើ​ឡើង«ដោយមានការធានាយ៉ាងពេញលេញ និងស៊ីជម្រៅ»។ ចំណែកអាជ្ញាធរ ក្នុងប្រទេសម៉ារ៉ុក បានបដិសេធសំណើ​សុំការអត្ថាធិប្បាយ៕