អេស្ប៉ាញ ៖ អង្គភាពតាមឃ្លាំមើល និងដោះស្រាយជម្លោះនានា (Ombudsman) របស់ប្រទេសអេស្ប៉ាញ នឹងស៊ើបអង្កេតការលិចទូកដែលធ្វើដំណើរទៅកាន់កោះកាណារី (Canary) ដោយចាកចេញពីប្រទេសម៉ារ៉ុក កាលពីថ្ងៃពុធកណ្ដាលសប្ដាហ៍នេះ បន្ទាប់ពីមានការបារម្ភថា ជនអន្តោប្រវេសន៍ជាង ៣០នាក់ បានស្លាប់។

អង្គការដែលផ្តោតលើការធ្វើអន្តោប្រវេសន៍ Walking Borders និង Alarm Phone បានរិះគន់ប្រទេសអេស្ប៉ាញ និងម៉ារ៉ុក នៅសប្តាហ៍នេះ ចំពោះការមិនធ្វើអន្តរាគមន៍ ឲ្យបានទាន់ពេលវេលា ដើម្បីជួយសង្រ្គោះអ្នកដំណើររបស់ទូកនេះ តែប្រទេសអេស្ប៉ាញ ប្រាប់ថា នីតិវិធីដ៏ត្រឹមត្រូវទាំងអស់ ត្រូវបានអនុវត្ត។

អង្គការ Walking Borders បាននិយាយថា ទូកបានលិច កាលពីថ្ងៃពុធ (ទី២១ ខែមិថុនា) ចម្ងាយ ៤០ម៉ាយល៍ (ប្រហែលជាង ៦៤គីឡូម៉ែត្រ) ពីឆ្នេរសមុទ្រអាហ្វ្រិក ពោលគឺមានរយៈ​ពេលដល់ទៅ ១២ម៉ោងបន្ទាប់ពីមានការស្នើសុំជំនួយពីដំបូង។ អង្គការទាំងពីរ បានឲ្យដឹងថា មានមនុស្សប្រហែល ៦០នាក់នៅលើទូកនោះ។

សេវាជួយសង្គ្រោះតាមសមុទ្ររបស់ប្រទេសអេស្ប៉ាញ បាននិយាយថា មនុស្សពីរនាក់ ដែលមានកុមារមា្នក់ និងបុរសពេញវ័យម្នាក់ ត្រូវបានរកឃើញថា ស្លាប់ ខណៈដែលជនអន្តោប្រវេសន៍​ចំនួន ២៤នាក់ ត្រូវបានជួយសង្គ្រោះ ដោយប្រទេសម៉ារ៉ុក។

អង្គភាពតាមឃ្លាំមើល និងដោះស្រាយជម្លោះនានា (Ombudsman) មានភារកិច្ចត្រួតពិនិត្យការរំលោភសិទ្ធិពលរដ្ឋ ដែលអាចកើតមានដោយរដ្ឋ ហើយអាចផ្តល់ការប្រឹក្សាដល់សភា ខណៈដែលរដ្ឋាភិបាលមានសិទ្ធិអំណាចតាមរដ្ឋធម្មនុញ្ញ ក្នុងការទទួលស្គាល់ និងប្រតិកម្មតបចំពោះរបាយការណ៍របស់អង្គភាពនេះ៕