មន្ត្រីខេត្តបាននិយាយថា ប្រទេសកាណាដាកំពុងទប់ទល់នឹងការចាប់ផ្តើមដ៏អាក្រក់បំផុតមិនធ្លាប់មានក្នុងរដូវកាលភ្លើងឆេះព្រៃ ប៉ុន្តែការជ្រើសរើសអ្នកពន្លត់អគ្គិភ័យមានការលំបាកកាន់តែខ្លាំងឡើង ដោយសារតែទីផ្សារការងារចង្អៀត និងលក្ខណៈតឹងតែងនៃការងារ។

ធនធានមានកម្រិត អាចគំរាមកំហែងដល់សមត្ថភាពរបស់ប្រទេសកាណាដាក្នុងការពន្លត់ភ្លើង ដែលត្រូវបានគេរំពឹងថានឹងរីកកាន់តែធំ និងកាចសាហាវនាពេលអនាគត ដោយសារការប្រែប្រួលអាកាសធាតុដែលជំរុញដោយឥន្ធនៈហ្វូស៊ីល ដែលប្រឈមនឹងការខូចខាតកាន់តែច្រើនដល់សហគមន៍ និងរំខានដល់ឧស្សាហកម្មប្រេង និងឧស្ម័ន ការជីកយករ៉ែ និងការកាប់បំផ្លាញព្រៃឈើរបស់ប្រទេសនេះ។

ការស្ទង់មតិរបស់ទីភ្នាក់ងារសារព័ត៌មាន Reuters ខេត្ត និងដែនដីទាំង ១៣ បានបង្ហាញថា ប្រទេសកាណាដាមានបុគ្គលិក ពន្លត់អគ្គិភ័យប្រហែល ៥.៥០០នាក់ ដោយមិនរាប់បញ្ចូលដែនដី Yukon ដាច់ស្រយាល ដែលមិនឆ្លើយតបនឹងសំណើសុំព័ត៌មាន។

លោក Mike Flannigan សាស្ត្រាចារ្យនៅសាកលវិទ្យាល័យ Thompson Rivers ក្នុងខេត្ត British Columbia និងជាអ្នកជំនាញខាងភ្លើងឆេះព្រៃបាននិយាយថា ប្រទេសនេះខ្វះខាត់កម្លាំងអ្នកពន្លត់អគ្គិភ័យប្រហែល ២.៥០០ នាក់៕