បាត់ដំបង៖ ឯកឧត្តមបណ្ឌិត ស្រេង វង្សហៀង ប្រធានក្រុមការងារគណបក្សប្រជាជនកម្ពុជា ចុះជួយឃុំព្រះផុស ស្រុកគាស់ក្រឡ ខេត្តបាត់ដំបង បានជំរុញដល់សមាជិកសមាជិកាគណបក្ស ដែលជាអាជ្ញាធរមូលដ្ឋាន ត្រូវបន្តដាស់តឿន និងផ្សព្វផ្សាយដល់ប្រជាពលរដ្ឋឱ្យត្រៀមឯកសារឱ្យបានរួចរាល់ សម្រាប់ការបោះឆ្នោត អាណត្តិទី៧ខាងមុខ ។

ការជំរុញនេះ ធ្វើឡើងក្នុងកិច្ចប្រជុំ រៀបចំផែនការ ត្រៀមឃោសនាបោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២៥ ខែមិថុនា ឆ្នាំ២០២៣ ដោយមានការចូលរួម ពីអនុប្រធានក្រុមការងារ និងប្រធានទទួលបន្ទុកតាមភូមិ រួមទាំងលោកមេឃុំ ក្រុមប្រឹក្សាឃុំ លោកមេភូមិ ទាំង៩ ក្នុងឃុំព្រះផុស យុវជនឃុំ ។

ក្នុងកិច្ចប្រជុំនេះ ឯកឧត្តម ស្រេង វង្សហៀង បានណែនាំដល់សមាជិក សមាជិកាគណបក្សត្រូវខិតខំ​ពង្រឹងកិច្ចសហការល្អក្នុងស្មារតីសាមគ្គីភាព ដើម្បីធ្វើយ៉ាងណាដណ្ដើមយកជ័យជំនះឱ្យខានតែបាន ក្នុងដំណើរការបោះឆ្នោតជ្រើសតាំងតំណាងរាស្រ្តនីតិកាលទី៧។

បន្ថែមពីនេះ ឯកឧត្តម បានណែនាំដល់យុវជនគណបក្សដែលជាសរសរទ្រូងប្រទេសជាតិ​ត្រូវខិតខំ​បម្រើប្រទេសជាតិដោយស្មោះត្រង់​ ចូលរួមក្នុងចលនាអភិវឌ្ឍន៍មូលដ្ឋាន ​ដើម្បីកសាងស្នាដៃ និងកិត្តិយសល្អសម្រាប់ទុកជាគំរូដល់យុវជនជំនាន់ក្រោយ។

ឯកឧត្តម ស្រេង វង្សហៀង បានណែនាំដល់សមាជិក សមាជិកា ត្រូវចុះជួបដោយផ្ទាល់ស្វែងយល់​ពីទុក្ខលំបាក និងដោះស្រាយបញ្ហាប្រឈមនានាជូនប្រជាពលរដ្ឋ​នៅក្នុងមូលដ្ឋាន​ឱ្យបានទាន់ពេលវេលាដោយមិនទុកប្រជាពលរដ្ឋណាម្នាក់ចោលឡើយ។

ឯកឧត្តម ប្រធានក្រុមការងារ ដាស់តឿនដល់ថ្នាក់ដឹកនាំគណបក្សត្រូវចុះអប់រំណែនាំ​ពន្យល់ដល់​បងប្អូន​ប្រជាពលរដ្ឋពីសារៈសំខាន់នៃការបោះឆ្នោត​ព្រមទាំងជំរុញ​ដល់ពួកគាត់ចូលរួមបោះឆ្នោត​ឱ្យបានគ្រប់ៗគ្នា ជាពិសេសត្រូវកៀរគរសមាជិកទៅ​បោះឆ្នោតជូន​គណបក្សប្រជាជនកម្ពុជាឱ្យបានគ្រប់ៗគ្នា។

សូមបញ្ជាក់ថា យុទ្ធនាការឃោសនាបោះឆ្នោតជ្រើសតាំងតំណាងរាស្រ្តនីតិកាលទី៧ នឹង​ធ្វើឡើងចាប់ពីថ្ងៃទី១ ដល់ថ្ងៃទី២១ ខែកក្កដា ​ខណៈការបោះឆ្នោតនឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៣។ក្នុងនោះ​គណបក្សប្រជាជនកម្ពុជាឈរនៅលេខរៀងចុងក្រោយបង្អស់ គឺលេខ១៨៕