ស៊ុយអែត៖ ទីភ្នាក់ងារសារព័ត៌មាន TT បានរាយការណ៍ ដោយដកស្រង់សម្តីអ្នកនាំពាក្យរបស់សួនកម្សាន្ត Grona Lund របស់ប្រទេសស៊ុយអែត ថា មនុស្សម្នាក់បានស្លាប់ និងជាច្រើននាក់ទៀតរងរបួស នៅក្នុងឧបទ្ទវហេតុធ្លាក់រថភ្លើងហោះលើអាកាស នៅសួនកម្សាន្តក្នុងរដ្ឋធានីនៃប្រទេសនេះ កាលពីថ្ងៃអាទិត្យ (ទី២៥ មិថុនា)។

ទូរទស្សន៍រដ្ឋ SVT ដោយដកស្រង់សម្ដីរបស់សាក្សីដែលឃើញផ្ទាល់ភ្នែក បានផ្សាយថា រថភ្លើងហោះ Jetline របស់សួនកម្សាន្តនេះ បានរត់ខុសផ្លូវមួយផ្នែក អំឡុងពេលជិះលេងនោះ។ គេឃើញថា រថយន្តសង្គ្រោះបន្ទាន់ រថយន្តពន្លត់អគ្គីភ័យ និងឧទ្ធម្ភាគចក្របានមកដល់ឧទ្យាន ហើយនគរបាលបានប្រាប់ថា កំពុងស៊ើបអង្កេត ចំពោះហេតុការណ៍នេះ។

សួនកម្សាន្ត Grona Lund បានឲ្យដឹងនៅក្នុងសេចក្តីថ្លែងការណ៍មួយថា ឧទ្យានដែលមានអាយុកាល ១៤០ឆ្នាំនេះ ត្រូវបានបិទជាបណ្ដោះអាសន្នសិន រហូតដល់មានការជូនដំណឹងបន្ថែម។ អ្នកនាំពាក្យមិនអាចទាក់ទងភ្លាមៗ ដើម្បីសុំការអត្ថាធិប្បាយបានទេ។

តាមរយៈគេហទំព័រផ្លូវការរបស់ខ្លួន សួនកម្សាន្តបានឲ្យដឹងថា រថភ្លើងហោះ Jetline មានផ្លូវរត់ក្នុងល្បឿនរហូតដល់ ៩០គីឡូម៉ែត្រក្នុងមួយម៉ោង និងកម្ពស់ ៣០ម៉ែត្រ ដោយមានអ្នកមកជិះលេងជាង ១លាននាក់ ក្នុងមួយឆ្នាំៗ៕