ភ្នំពេញ​៖ ឯកឧត្តម ទេសរដ្ឋមន្ត្រី លី ធុជ អនុប្រធាន​ទី​១ អាជ្ញាធរ​មីន នៅ​ថ្ងៃទី​២៦ ខែមិថុនា​នេះ បាន​អញ្ជើញ​ជា​អធិបតី​ក្នុង​ពិធី​ប្រគល់​វិញ្ញាបនបត្រ និង​សម្ភារៈ​សង្គ្រោះ​បឋម ជូន​ដល់​មន្ត្រី បុគ្គលិក​អាជ្ញាធរ​មីន​ចំនួន ៤៥ នាក់ ដែល​បានទទួល​វគ្គ​បណ្តុះបណ្តាល​សង្គ្រោះ​បឋម (First Aid Training) កាលពី​ថ្ងៃទី​០៩ ខែមិថុនា ឆ្នាំ​២០២៣ នៅ​សណ្ឋាគារ ហ៊ី​ម៉ា​វ៉ា​រី រាជធានី​ភ្នំពេញ​។​

​ក្នុងនាម​ថ្នាក់ដឹកនាំ មន្ត្រី បុគ្គលិក អាជ្ញាធរ​មីន ឯកឧត្តម ទេសរដ្ឋមន្ត្រី លី ធុជ បាន​ថ្លែងអំណរគុណ​យ៉ាង​ជ្រាលជ្រៅ​ជូន​ចំពោះ លោក អេ​ន​ទ្រូ ថេ (Andrew Tay) នាយក​សណ្ឋាគារ​ហ៊ី​ម៉ា​វ៉ា​រី និង​ជា​ប្រធាន​អង្គការ St John Phnom Penh ដែល​បាន​ផ្តល់នូវ​វគ្គ​បណ្តុះបណ្តាល​សង្គ្រោះ​បឋម ជូន​ដល់​មន្ត្រី បុគ្គលិក​អាជ្ញាធរ​មីន ដែល​វគ្គ​បណ្តុះបណ្តាល​នេះ បានទទួល​បានការ​គាំទ្រ និង​បង្រៀន​ដោយ​ក្រុមគ្រូពេទ្យ​ស្ម័គ្រចិត្ត​មកពី​អង្គការ​សេន​ច​ន​ភ្នំពេញ​។

​ក្រៅពីនេះ ឯកឧត្តម ទេសរដ្ឋមន្ត្រី ក៏បាន​ថ្លែងអំណរគុណ​ជូន​ចំពោះ Singapore Club Cambodia ដែល​បាន​ផ្តល់នូវ​សម្ភារៈ​សង្គ្រោះ​បឋម​ចំនួន ២០ ជូន​ដល់​អាជ្ញាធរ​មីន សម្រាប់​ការប្រើប្រាស់​ក្នុងករណី​ចាំបាច់​។​ហើយ​សម្ភារៈ​សង្គ្រោះ​បឋម​នេះ គឺជា​សម្ភារៈ​មួយ​ដែល​សំខាន់ និង​ចាំបាច់​សម្រាប់​មន្ត្រី​បុគ្គលិក​អាជ្ញាធរ​មីន យកទៅ​ប្រើប្រាស់​ក្នុង​ការចុះ​បំពេញបេសកកម្ម​ការងា​រ​នៅតាម​សហគមន៍ និង​ចុះ​ពិនិត្យ​ការងារ​បោសសម្អាត​មីន​នៅ​ទីវាល​។

​ជាមួយគ្នា​នោះ ឯកឧត្តម​បាន​គូសបញ្ជាក់ថា សម្រាប់​វិភាគទាន​របស់​អង្គការ St John ចំនួន ៥.០៥០ ដុល្លារ ដែល​ផ្តល់ជូន​មក​អាជ្ញាធរ​មីន នឹងត្រូវ​ប្រើប្រាស់​កិច្ចការ​សង្គ្រោះ​ជនរងគ្រោះ​ដោយសារ​មីន និង​សំណល់​ជាតិ​ផ្ទុះ​ពី​សង្គ្រាម និង​ការងារ​អប់រំ​ផ្សព្វផ្សាយ​ការយល់ដឹង​អំពី​យុទ្ធភណ្ឌ​មិនទាន់​ផ្ទុះ តាម​តម្រូវការ​របស់​សហគម​ន៍​ដែល​រង​ផលប៉ះពាល់​ដោយសារ​មីន​ជាដើម​៕ អត្ថបទ​៖​ទូច សោភ័ណ