ប្រធានាធិបតីអាមេរិកលោក Joe Biden នៅថ្ងៃចន្ទ (ទី២៦ ខែមិថុនា) គ្រោងនឹងបង្ហាញថា តើការវិនិយោគចំនួន ៤២ពាន់លានដុល្លារ ក្នុងការពង្រីកការប្រើប្រាស់ប្រព័ន្ធអ៊ិនធឺណិត នឹងត្រូវបែងចែកក្នុងចំណោមរដ្ឋចំនួន ៥០របស់ប្រទេសនេះយ៉ាងដូចម្ដេច ដែលនេះជាកិច្ចខិតខំប្រឹងប្រែង ដើម្បីផ្តល់ឲ្យប្រជាជន នៅសហរដ្ឋអាមេរិកទាំងអស់នូវលទ្ធភាពប្រើប្រាស់អ៊ិនធឺណិតល្បឿនលឿន នៅឆ្នាំ២០៣០។

ការសម្រេចនេះនឹងចាប់ផ្តើមជើងទីពីរនៃដំណើរទេសចរណ៍របស់លោក Biden ដែលកំពុងបង្ហាញថា តើច្បាប់ដែលទទួលការបានអនុម័តដោយសភា ក្នុងអំឡុងពេលពាក់កណ្តាលអាណត្តិដំបូងរបស់លោក នឹងមានផលប៉ះពាល់ដល់ប្រជាជនអាមេរិកជាមធ្យមយ៉ាងណា ក្នុងខណៈដែលការប៉ុនប៉ងរបស់លោក ដើម្បីបានជាប់ឆ្នោតជាថ្មី កំពុងកើនឡើងខ្លាំង។

លោក Jeff Zients ប្រធានបុគ្គលិកសេតវិមាន បាននិយាយថា៖ «យើងមានឱកាសជាប្រវត្តិសាស្ត្រ នៅទីនេះ ដើម្បីធ្វើឲ្យមានភាពខុសប្លែកយ៉ាងពិតប្រាកដ នៅក្នុងជីវិតមនុស្សប្រចាំថ្ងៃ និងធ្វើឲ្យប្រាកដថា យើងផ្តល់នូវសក្តានុពលនោះ គឺជាអ្វីដែលយើងកំពុងមានជារៀងរាល់ថ្ងៃ ហើយត្រូវប្រាកដថា មនុស្សមានអារម្មណ៍ថា ទោះនៅទីណា នៅតុផ្ទះបាយរបស់ពួកគេ ក្នុងសហគមន៍របស់ពួកគេ និងនៅក្នុងសួនស្មៅរបស់ពួកគេ ក៏មានអ៊ិនធឺណិត»។

លោក Zients បានប្រៀបធៀបកិច្ចប្រឹងប្រែងក្នុងការផ្ដល់អ៊ិនធឺណិតល្បឿនលឿននេះ ទៅនឹងកិច្ចខិតខំរបស់លោកប្រធានាធិបតី Franklin Roosevelt ក្នុងឆ្នាំ១៩៣៦ ក្នុងការធ្វើឲ្យតំបន់ជនបទនៅសហរដ្ឋអាមេរិក មានអគ្គិសនីប្រើប្រាស់។ រដ្ឋបាលប៉ាន់ប្រមាណថា មានទីតាំងប្រហែល ៨,៥លានកន្លែង នៅសហរដ្ឋអាមេរិក ដែលមិនមានលទ្ធភាពប្រើប្រាស់អ៊ិនធឺណិតល្បឿនលឿន៕