ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ និង​ជា​ប្រធាន​ក្រុម​ប្រឹក្សា​សាលា​ភូមិន្ទ​រដ្ឋបាល អញ្ជើញបើកបាឋកថាស្តីពី «ឧស្សាហកម្មសម័យអង្គររបស់អាណាចក្រខ្មែរ» វាគ្មិន​កិត្តិយស​៖ សាស្ត្រាចារ្យបណ្ឌិត ធុយ ចាន់ធួន អនុប្រធានវិទ្យាស្ថានវប្បធម៌ និងវិចិត្រសិល្បៈ នៃ​រាជ​បណ្ឌិត្យសភាកម្ពុជា, នាព្រឹកថ្ងៃទី២៧ ខែមិថុនានេះ។

ក្នុងពិធីបើកបាឋកថាស្តីពី «ឧស្សាហកម្មសម័យអង្គររបស់អាណាចក្រខ្មែរ» ជូនដល់ថ្នាក់ដឹកនាំ គ្រូឧទ្ទេស មន្ត្រីរាជការ សិស្សមន្ត្រី និងកម្មសិក្សាការី ឆ្នាំ២០២៣ នៃសាលាភូមិន្ទរដ្ឋបាល សរុប​ទាំង​អស់ ៨២០អង្គ/នាក់ ដែលកំពុងចូលរួមដោយផ្ទាល់នៅក្នុងសហសាលនេះ និង​ពី​ចម្ងាយ​តាម​ប្រព័ន្ធ Microsoft Teams របស់សាលាភូមិន្ទរដ្ឋបាល, ឯកឧត្តម ព្រុំ សុខា បានថ្លែងថា ក្នុងក្រប​ខណ្ឌ​នៃ​ការបណ្តុះបណ្តាលរបស់សាលាភូមិន្ទរដ្ឋបាល បាឋកថា ត្រូវបាន​ចាត់​ទុក​​ជា​វេទិកា​ដ៏​សំខាន់​មិន​អាច​ខ្វះបាន ដើម្បីពង្រឹងសមត្ថភាព សិស្សមន្ត្រី និងកម្មសិក្សាការី។ តាម​រយៈ​វេទិកា​នេះ​ ថ្នាក់ដឹកនាំ មន្ត្រីជាន់ខ្ពស់របស់រាជរដ្ឋាភិបាល មន្ត្រីជំនាញ និងសាស្ត្រាចារ្យ​ម​ក​ពី​សាក​ល​វិទ្យាល័យ​ល្បី​ទាំង​ក្នុង និងប្រទេស អាចផ្តល់នូវការចែករំលែកចំណេះដឹង និងបទពិសោធន៍ ពាក់​ព័ន្ធ​នឹង​ចក្ខុវិស័យ ទស្សនាទាន ឧត្តមានុវត្តន៍ លើការដឹកនាំ និងការគ្រប់គ្រងសាធារណៈ ការ​លើក​ក​ម្ពស់​គុណធម៌ជាមន្ត្រី ភាពជាគំរូក្នុងការដឹកនាំ និងការបំពេញការងារ ការងារកែទម្រង់ និង​ការ​អនុវត្ត​គោល​នយោបាយទាំងឡាយរបស់ក្រសួង-ស្ថាប័ន តាម​វិស័យ​របស់​រាជ​រដ្ឋាភិបាល​រួម​ទាំង​គោល​នយោបាយ​ការបរទេសផងដែរ។ ផ្អែកលើផែនការការងារឆ្នាំ២០២៣ សាលាភូមិន្ទរដ្ឋបាល បានកំណត់គោលដៅរៀបចំបាឋកថា យ៉ាងតិចចំនួន១០។ ដោយឡែក បាឋកថា​លើក​ទី៥​ ប្រ​​ចាំ​ឆ្នាំ​២០២៣ ស្តីពី «ឧស្សាហកម្មសម័យអង្គរក្នុងអាណាចក្រខ្មែរ» ក្នុងវេលានេះ មាន​លក្ខណៈ​ពិសេស​ខុស​ប្លែក​ពី​ប្រធាន​បទរបស់បាឋកថាលើកមុនៗ ដោយប្រធានបទលើកនេះ គឺជា​សមិទ្ធផល នៃ​ការអនុវត្តគម្រោងសិក្សាស្រាវជ្រាវ ក្រោម​ការ​ដឹកនាំ​ផ្ទាល់​របស់​វា​គ្មិន​កិត្តិយស​សាស្ត្រាចារ្យ​បណ្ឌិត ធុយ ចាន់ធួន ដែលបានរុករកឃើញទីតាំងផលិតដែកសម័យអង្គរ ដ៏ធំ​នៅ​ក្នុង​តំបន់​ខេត្ត​ព្រះវិហារ រហូតដល់អាចបង្កើតបានជាឧទ្យានរាជបណ្ឌិត្យសភាតេជោឬស្សីត្រឹប។ ស្នាដៃ​ស្រាវជ្រាវ ក៏ដូចជាសមទ្ធិផល រួមចំណែកដល់​ការ​សិក្សា​ស្វែង​យល់​អំពី​តួនាទី​ឧស្សាហកម្ម​ដែក​បុរាណ ក្នុងការកសាងអាណាចក្រខ្មែរ ដែលបានបន្សល់នូវភស្តុតាងអរិយធម៌ខ្មែរ ប្រាសាទ​ខ្មែរ នៅរាប់រយទីតាំងនៅប្រទេសលាវ ប្រទេសថៃ និងវៀតណាម សព្វថ្ងៃ។

ឯកឧត្តម រដ្ឋមន្រី្ត បានបញ្ជាក់ទៀតថា ក្នុងឆ្នាំ២០២៣ សាលាភូមិន្ទរដ្ឋបាល បាននិង​កំពុង​ផ្តល់​ការ​បណ្តុះ​បណ្តាល​ដំបូងដល់សិស្សមន្ត្រីជាន់ខ្ពស់ ជំនាន់ទី១២ មានចំនួនសរុប ៩៣នាក់ (នារី៣២នាក់) សម្រាប់រយៈពេល២ឆ្នាំ ដែលបែងចែកជាបីជំនាញ គឺជំនាញរដ្ឋបាលទូទៅ មាន​ចំនួន​៣៥នាក់ (នារី៩នាក់), ជំនាញសេដ្ឋកិច្ច និងហិរញ្ញវត្ថុ មានចំនួន៣៤នាក់ (នារី១២នាក់) និង​ជំនាញ​ទំនាក់ទំនងអន្តរជាតិ មានចំនួន២៤នាក់ (នារី១១នាក់)។ សាលាក៏​បាន​បណ្តុះ​បណ្តាល​ដំបូង​ដល់សិស្សមន្ត្រីក្រមការ ជំនាន់ទី១០ មានចំនួនសរុប១២១នាក់ (នារី៣៨នាក់) សម្រាប់ រយៈពេល ១២ខែ។ ទន្ទឹមនេះ សាលាភូមិន្ទរដ្ឋបាល ក៏បាននិង​កំពុង​ផ្តល់​ការ​បណ្តុះ​បណ្តាល​បន្ត​រយៈពេល ៩ខែ ដល់ កម្មសិក្សាការីនៃវគ្គវិក្រឹតការ ក្នុងឆ្នាំ២០២៣ ចំនួន៦០៨​អង្គ​នាក់ (នារីចំនួន១៣១ និងព្រះសង្ឃ៣០អង្គ) ដែលនិមន្ត និងអញ្ជើញមកពីបណ្តាក្រសួង-ស្ថាប័ន ថ្នាក់ជាតិ និងរដ្ឋបាលថ្នាក់ក្រោមជាតិ ហើយត្រូវបានបែងចែកជាបួនវគ្គ ទៅតាម​កម្រិត​មុខ​តំណែង និងប្រភេទក្របខណ្ឌ រួមមាន៖ វគ្គវិក្រឹតការមន្ត្រីជាន់ខ្ពស់១៩២នាក់ ក្នុងនោះ​នារី​២៦​នាក់ និងព្រះសង្ឃ២២អង្គ, វគ្គវិក្រឹតការមន្ត្រីមធ្យម ៣១៦នាក់ ក្នុងនោះនារី៧២នាក់, វគ្គវិក្រឹត​ការមន្ត្រីគ្រប់គ្រងរដ្ឋបាល ៨០នាក់ ក្នុងនោះនារី២៦នាក់ និងព្រះសង្ឃ ០៨អង្គ និងវគ្គ​វិក្រឹត​ការ​មន្ត្រីក្រមការ ២០នាក់ ក្នុងនោះនារី៧នាក់៕ អត្ថបទ៖ រដ្ឋា