កណ្ដាល៖​ បណ្តាសិស្សានុសិស្សតាមវិទ្យាល័យ នៅក្នុងភូមិសាស្ត្រខេត្តកណ្តាល និងរាជធានីភ្នំពេញ បានថ្លែងថា យើងមានការសប្បាយរីករាយ និងមានពេញចិត្តជាខ្លាំង ដោយបានគ្រប់អាយុ ក្នុងការ​បំពេញកាតព្វកិច្ចចូលរួមបោះឆ្នោតជាលើកដំបូងរបស់ខ្លួន បោះឆ្នោតជូនគណបក្ស​នយោបាយ និងជ្រើសរើសមេដឹកនាំប្រទេស ​ដែលគេស្រឡាញ់ ​ដើម្បីបន្តការអភិវឌ្ឍ ទៅរកការរីកចំរើន។

សិស្សថ្លែងថា នៅពេលនេះ យើងទាំងអស់គ្នាសិក្សាថ្នាក់ទី១២ បានធ្វើអត្តសញ្ញាណបណ្ណ និងបានទៅចុះឈ្មោះឆ្នោត តាមស្នាក់ឃុំសង្កាត់រួចហើយ​ ហើយនៅក្នុងការទទួលបានសិទ្ធ កាតព្វកិច្ច បោះឆ្នោតជាលើកដំបូងនេះ យើងបានត្រៀមខ្លួន និងបានធ្វើការសម្រេចចិត្តរួចហើយ ចូលរួមបោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ខែក្រោយនេះ​ ដើម្បីជ្រើសរើសមេដឹកនាំប្រទេស បន្តការអភិវឌ្ឍប្រទេស ឲ្យរីកចំរើនថែមទៀត ។ដោយមានការណែនាំថ្នាក់ដឹកនាំ​ក្រសួង​អប់រំយុវជន​ និងកីឡា ​និងគណៈកម្មាធិការជាតិរៀបចំការ​បោះឆ្នោត គ.ជ.ប មកដល់ពេលនេះ ​បណ្តាថ្នាក់ដឹកនាំសាលា ​នៅកម្រិតវិទ្យាល័យ បានធ្វើការ​តាមដាន និងបានណែនាំសិស្សានុសិស្សអាយុចាប់ពី១៥ឆ្នាំឡើងត្រូវទៅ​ធ្វើ​អត្តសញ្ញាណបណ្ណ​សញ្ជាតិខ្មែរគំរូថ្មី ​ហើយសិស្សានុសិស្សមានអាយុចាប់ពី១៨ ឆ្នាំឡើងទៅគឺត្រូវបានណែនាំ​ឲ្យចុះឈ្មោះបោះឆ្នោតផងដែរ ជាពិសេសសម្រាប់សិស្សសិក្សាថ្នាក់ទី១២ និងសិស្សមួយចំនួន​សិក្សានៅថ្នាក់ទី១១ ៕ អត្ថបទ ស៊ុម សុខជា