អតីតប្រធានក្រុមហ៊ុន Audi លោក Rupert Stadler ត្រូវបានតុលាការក្រុងមុយនិច (Munich) សម្រេចក្ដីឲ្យជាប់​ទោស​ដោយការទោសព្យួររយៈពេល ១ឆ្នាំ និង ៩ខែ ពីបទក្លែងបន្លំដោយការធ្វេសប្រហែសក្នុងរឿងអាស្រូវ​ប្រេង​ម៉ាស៊ូត​ឆ្នាំ២០១៥ ដោយការសម្រេចនេះ បានធ្វើឲ្យលោកក្លាយជាអតីតសមាជិកក្រុមប្រឹក្សាភិបាលរបស់ក្រុមហ៊ុន Volkswagen ដំបូងគេ ដែលទទួលការកាត់ទោសបែបនេះ។

តុលាការបានឲ្យដឹងថា អតីតប្រធានរូបនេះ ត្រូវបានពិន័យជាប្រាក់ចំនួន ១,១លានអឺរ៉ូ (១,២០លានដុល្លារ) ដែល​ប្រាក់​នេះនឹងត្រូវបញ្ជូនទៅកាន់រតនាគាររដ្ឋ និងអង្គការមិនមែនរដ្ឋាភិបាល។ ការជាប់ទោស គឺស្ថិត​នៅក្នុងរយៈ​ពេលដ៏ជាក់​លាក់​ចន្លោះពី ១ឆ្នាំកន្លះ ទៅ ២ឆ្នាំ ដែលចៅក្រមបាននិយាយថា អតីតនាយកប្រតិបត្តិរូបនេះ នឹងប្រឈមជាមួយនឹង​រយៈពេលប៉ុណ្ណឹង ប្រសិនបើលោកព្រមសារភាពពីភាពមានទោស ចំពោះការចោទប្រកាន់។

មេធាវីរបស់លោក លោក Ulrike Thole-Groll បាននិយាយកាលពីខែឧសភាថា លោក Stadler មិនដឹងថាយានយន្ត​ត្រូវបានក្លែងបន្លំ ហើយអ្នកទិញត្រូវបានធ្វើឲ្យខាតបង់នោះទេ ប៉ុន្តែទទួលស្គាល់ថា វាជារឿងដែលអាចកើតមាន ហើយបានព្រមទទួលថា ចាំបាច់ត្រូវមានការថែទាំបន្ថែមទៀត។

ដើមឡើយ រដ្ឋអាជ្ញាចង់ផាកពិន័យចំនួន ២លានអឺរ៉ូ ដោយយោងទៅលើប្រាក់ខែរបស់លោក Stadler នៅក្រុមហ៊ុន Audi និង Volkswagen និងទ្រព្យសម្បត្តិហិរញ្ញវត្ថុ និងអចលនទ្រព្យរបស់លោក។ ការកាត់ក្តីចំពោះលោក Stadler ដែលជា​ដំណើរការតុលាការមួយ ក្នុងចំណោមដំណើរការដ៏លេចធ្លោបំផុត បន្ទាប់ពីរឿងអាស្រូវប្រេងម៉ាស៊ូត បានបន្តតាំង​ពីឆ្នាំ២០២០។

ក្រុមហ៊ុនមេរបស់ Audi គឺ Volkswagen (VOWG_p.DE) និង Audi បានទទួលស្គាល់ក្នុងឆ្នាំ២០១៥ ថាបានប្រើកម្មវិធី​ខុសច្បាប់ ដើម្បីបន្លំការធ្វើតេស្តបញ្ចេញឧស្ម័ន៕