ប្រជាជនកូរ៉េខាងត្បូង នៅថ្ងៃពុធ (ទី២៨ ខែមិថុនា) នេះ មានអារម្មណ៍រីករាយ ដែលនឹងមានអាយុក្មេងជាងវ័យ ១ឆ្នាំ ឬ ២ឆ្នាំ ខណៈដែលច្បាប់ថ្មី​ដែលតម្រូវឲ្យប្រើតែវិធីសាស្រ្តអន្តរជាតិ នៃការរាប់អាយុចូលជាធរមាន ដោយជំនួសវិធីសាស្ត្របែបប្រពៃណីរបស់ប្រទេស។

ប្រទេសកូរ៉េខាងត្បូង តាំងពីដើមទសវត្សរ៍ឆ្នាំ១៩៦០ បានប្រើបទដ្ឋានអន្តរជាតិនៃការគណនាពីសូន្យ នៅពេលកើត និងបន្ថែម១ឆ្នាំទៀត នៅរៀងរាល់ថ្ងៃកំណើត សម្រាប់​ឯកសារ​វេជ្ជសាស្ត្រ និងច្បាប់។

ប៉ុន្តែប្រជាជនកូរ៉េខាងត្បូងជាច្រើន បានបន្តប្រើវិធីរាប់បែបប្រពៃណី សម្រាប់កិច្ចការអ្វីៗផ្សេងទៀត។ កាលពីខែធ្នូឆ្នាំមុន ប្រទេសកូរ៉េខាងត្បូង បានអនុម័តច្បាប់​លុបបំបាត់​វិធីសាស្រ្ត​រាប់អាយុតាម​បែបប្រពៃណី ដើម្បីទទួលយកយ៉ាងពេញលេញនូវការរាប់ស្តង់ដារអន្តរជាតិ។

លោក Lee Wan-kyu រដ្ឋមន្ត្រីក្រសួងនីតិកម្មរបស់រដ្ឋាភិបាល បានប្រាប់សន្និសីទសារព័ត៌មានមួយ កាលពីថ្ងៃចន្ទ (ទី២៦ ខែមិថុនា) ថា៖ «យើងរំពឹងថា ជម្លោះផ្លូវច្បាប់ ពាក្យបណ្តឹង និង​ការ​ភ័ន្តច្រឡំក្នុងសង្គម ដែលត្រូវបានបង្កឡើងលើរបៀបគណនាអាយុ នឹងត្រូវបានកាត់បន្ថយយ៉ាងច្រើន»។

យោង​តាមការស្ទង់មតិរបស់រដ្ឋាភិបាល ដែលធ្វើឡើងក្នុងខែកញ្ញា ឆ្នាំ២០២២ ប្រជាជនកូរ៉េខាងត្បូង ៨៦ភាគរយ បាននិយាយថា ពួកគេនឹងប្រើប្រាស់អាយុគិតតាមរបៀបអន្តរជាតិ ក្នុង​ជីវិត​ប្រចាំថ្ងៃរបស់ពួកគេ នៅពេលដែលច្បាប់ថ្មីចូលជាធរមាន។

ប្រព័ន្ធ​អាយុមួយទៀត មានសម្រាប់ការចុះឈ្មោះចូលបម្រើកងទ័ព ការចូលសាលា និងការគណនាអាយុស្របច្បាប់ក្នុងការទទួលទានគ្រឿងស្រវឹង និងជក់បារី ពោល គឺអាយុ​របស់​មនុស្ស​ត្រូវបានគណនាពីសូន្យនៅពេលកើត ហើយត្រូវបានបន្ថែម១ឆ្នាំទៀត នៅថ្ងៃទី១ ខែមករា។ មន្ត្រីបាននិយាយថា វិធីសាស្ត្រនេះនឹងនៅតែមាន រហូតដល់មានការតាក់តែងថ្មី៕