ភ្នំពេញ៖ ឯកឧត្តម ឌិត ទីណា ប្រធានគណៈកម្មាធិការគណបក្ស ក្រសួងកសិកម្ម រុក្ខាប្រមាញ់ និងនេសាទ កាលពីល្ងាចថ្ងៃទី២៩ ខែមិថុនា ឆ្នាំ២០២៣ បានចូលរួមជាអធិបតីក្នុង​ពិធី​សំណេះសំណាល​ជាមួយថ្នាក់ដឹកនាំ និងសមាជិក សមាជិកាគណបក្ស នៃគណៈកម្មាធិការ​គណបក្សក្រសួងកសិកម្ម រុក្ខាប្រមាញ់ និងនេសាទ នៅវិមាន៧មករា។

ក្នុងពិធីសំណេះសំណាលនេះ ឯកឧត្តមរដ្ឋមន្ត្រី បានសម្តែងនូវអារម្មណ៍​សប្បាយរីករាយ និង​ថ្លែងអំណរគុណចំពោះការស្ម័គ្រចិត្តចូលរួមរបស់សកម្មជនគណបក្សចំនួន ៣.០៧៦រូប ព្រមទាំងអបអរសាទរសមាជិកថ្មីទាំង ​១.២៨៥រូបផងដែរ។

នាឱកាសនេះដែរឯកឧត្តម ​បានសង្កត់​បញ្ជាក់ថា ​ភាពជាសមាជិកបក្សមានកាតព្វកិច្ច​គឺត្រូវ​បោះឆ្នោតជូនបក្ស ​ហើយសកម្មជនបក្សត្រូវជួយការងារបក្ស​ ជួយបក្សឱ្យឈ្នះឆ្នោត ជូនថ្នាក់​ដឹកនាំតាមការចាត់តាំង ដែលការងារនេះ ត្រូវមានភាពវៃឆ្លាតក្នុងការងារមូលដ្ឋាន និង​ផ្សព្វផ្សាយតាមបណ្តាញសង្គមផ្សេងៗតាមគ្រប់រូបភាព ​ដើម្បីទទួលបានជ័យជំនះជូនគណបក្ស។ គណបក្សមានគោលនយោបាយតែមួយ ដើម្បីប្រជាជន ដើម្បីយើងទាំងអស់គ្នា ដូច្នេះត្រូវមានសាមគ្គីភាព សហការគ្នាល្អ ​ចូលរួមជាមួយគ្នា និងជួយគ្នាទៅវិញទៅមក តាមរយៈវប្បធម៌ចែករំលែកទាំងកំលាំង ធនធាន ការងារ ចំណេះដឹង និងបទពិសោធន៍។

ឯកឧត្តម បានធ្វើពន្យល់យ៉ាងក្បោះក្បាយអំពីការចុះមូលដ្ឋានការងារកសិកម្ម និងនយោបាយ ដើម្បីឱ្យអង្គពិធីបានយល់ច្បាស់។ នៅបរិយាកាសប្រកបដោយភាពភារតនេះដែរ ​ឯកឧត្តម បាន​លើកឡើងអំពីការនឹងរៀបចំឱ្យមានការជួបជុំសកម្មជន​គណបក្សប្រចាំឆ្នាំ ដើម្បីឱ្យសមាជិកក្លាយ​ជាសកម្មជនពិតប្រាកដ៕