សហរដ្ឋអាមេរិកបានឲ្យដឹង កាលពីថ្ងៃព្រហស្បតិ៍ (ទី២៩ ខែមិថុនា) ថា ខ្លួនបានគ្រោងលក់គ្រាប់រំសេវ និងគ្រឿងបន្លាស់ផ្សេងៗទៀត ក្នុងទំហំទឹកប្រាក់ចំនួន ៤៤០លានដុល្លារ​ឲ្យទៅ​កោះតៃវ៉ាន់ ដែលជាកិច្ចប្រឹងប្រែងចុងក្រោយបំផុតរបស់ខ្លួន ក្នុងការជំរុញដល់ការការពារដីកោះស្វ័យគ្រប់គ្រងនេះ ខណៈដែលមានភាពតានតឹងកាន់តែខ្លាំងឡើងជាមួយប្រទេសចិន។

តែការលក់នេះមានទំហំដូចជាតូច ហើយមិនបានពង្រីកទំហំគ្រឿងសព្វាវុធរបស់សហរដ្ឋអាមេរិកទៅកាន់កោះតៃវ៉ាន់ទេ ប៉ុន្តែវាបានកើតឡើងនៅពេលដែលសហរដ្ឋអាមេរិក និងចិន​បោះ​ជំហានយ៉ាងប្រយ័ត្នប្រយែង ដើម្បីរក្សាស្ថិរភាពទំនាក់ទំនងដ៏រង្គោះរង្គើរបស់ប្រទេសមហាអំណាចទាំង២។

នៅក្នុង​ការជូនដំណឹងទៅសភា ក្រសួងការបរទេសអាមេរិក បាននិយាយថា នឹងមានការលក់គ្រាប់រំសេវទំហំ ៣០មីលីម៉ែត្រ និងឧបករណ៍ពាក់ព័ន្ធផ្សេងទៀតក្នុងចំនួនទឹកប្រាក់ ៣៣២,២​លានដុល្លារទៅឲ្យកោះតៃវ៉ាន់ និង ១០៨លានដុល្លារ ជាសម្ភារៈគ្រឿងបន្លាស់ និងជួសជុល សម្រាប់យានយន្ត និងសព្វាវុធ។

ក្រសួងបានរៀបរាប់ថា៖ «ការលក់នេះនឹងជួយឲ្យកោះតៃវ៉ាន់បន្តសមត្ថភាពការពារដ៏គួរឲ្យទុកចិត្ត ប៉ុន្តែនឹងមិនផ្លាស់ប្តូរតុល្យភាពយោធាជាមូលដ្ឋាននៅក្នុងតំបន់នោះទេ។ ការលក់នេះ នឹងជួយធ្វើឲ្យសន្តិសុខរបស់អ្នកទិញកាន់តែប្រសើរឡើង និងជួយក្នុងការរក្សាស្ថិរភាពនយោបាយ តុល្យភាពយោធា និងភាពរីកចម្រើនសេដ្ឋកិច្ច ក្នុងតំបន់»។

សភាមានសិទ្ធិបដិសេធការលក់នេះ ប៉ុន្តែទង្វើបែបនេះទំនងជាមិនកើតមាននោះទេ ដោយសមាជិកសភាបានជំរុញឲ្យសហរដ្ឋអាមេរិកបន្តទៅមុខ និងផ្តល់អាវុធ​ដោយផ្ទាល់​ដល់កោះ​តៃវ៉ាន់ ជាជាងអនុម័តសំណើទិញរបស់ខ្លួន៕