ខ្យល់ព្យុះកួចដ៏មានឥទ្ធិពលមួយបានបោកបក់កាត់កណ្តាលខេត្ត អាល់ប៊ឺតតា ប្រទេសកាណាដា កាលពីថ្ងៃសៅរ៍ (១ កក្កដា) ដោយបានបំផ្លាញផ្ទះសម្បែង និងដើមឈើនៅតាមតំបន់ជនបទនៃខេត្តនេះ។

របាយការណ៍ព័ត៌មានក្នុងស្រុកដោយសំអាងដល់សម្តីក្រុមមន្ត្រីរដ្ឋាភិបាល បាននិយាយថា ខ្យល់ព្យុះកួចនោះបានឆ្លងកាត់រវាងតំបន់ Didsbury និង Carstairs នៃខេត្ត អាល់ប៊ឺតតា ហើយបានវាយប្រហារផ្ទះសម្បែងយ៉ាងហោចណាស់ ១២ខ្នង។ មិនមានអ្នកស្លាប់ត្រូវបានគេរាយការណ៍នោះទេ។

រូបភាពវីដេអូបង្ហាញពីរថយន្តរងការខូចខាតបានគរពីលើគ្នា និងផ្ទះសម្បែងដែលរងការ ខូចខាតព័ន្ធទៅដោយដើមឈើ និងកម្ទេចកម្ទីបាក់បែក។ ខ្យល់ព្យុះកួចនេះបានវាយប្រហារតំបន់មួយនេះនៅចំការប្រារព្ធទិវាប្រទេសកាណាដា ដែលជាការប្រារព្ធខួបលើកទី ១៥៦របស់ប្រទេសនេះ៕