តូក្យូ៖ អ្នកការទូតហិរញ្ញវត្ថុជាន់ខ្ពស់របស់ប្រទេសជប៉ុន លោក Masato Kanda បាននិយាយនៅថ្ងៃអង្គារ (៤ កក្កដា)នេះថា ក្រុមអាជ្ញាធរជប៉ុនមានទំនាក់ទំនងយ៉ាងជិតស្និទ្ធជាមួយរដ្ឋមន្ត្រីក្រសួងរតនាគារសហរដ្ឋអាមេរិកលោកស្រី Janet Yellen និងមន្ត្រីក្រៅប្រទេសផ្សេងទៀត "ស្ទើរតែរាល់ថ្ងៃ" លើបញ្ហារូបិយប័ណ្ណ និងទីផ្សារហិរញ្ញវត្ថុទូលំទូលាយ។

រដ្ឋមន្ត្រីក្រសួងហិរញ្ញវត្ថុជប៉ុនលោក Shunichi Suzuki បានបញ្ជាក់ថា ទីក្រុងតូក្យូ និងទីក្រុងវ៉ាស៊ីនតោន មានទំនាក់ទំនងជិតស្និទ្ធជាមួយគ្នាលើការផ្លាស់ប្តូររូបិយប័ណ្ណ ប៉ុន្តែបានបដិសេធមិនបង្ហាញពីអ្វីដែលកំពុងពិភាក្សានោះទេ។

គួរកត់សម្គាល់ថា លោក Suzuki បានបញ្ឈប់ការព្រមានដោយពាក្យសំដីរបស់លោកដោយជៀសវាងការបញ្ចេញមតិដូចជា "ព្រួយបារម្ភយ៉ាងខ្លាំងអំពីបញ្ហាប្រាក់យ៉េនធ្លាក់ចុះ" ឬត្រៀមខ្លួនជាស្រេចដើម្បីចាត់វិធានការ "ដាច់ណាត់" នៅក្នុងទីផ្សាររូបិយប័ណ្ណ ជាឃ្លាដែលលោកធ្លាប់បានប្រើ មុនការអន្តរាគមន៍កាលពីឆ្នាំមុន។

ក្រុមអាជ្ញាធរជប៉ុនចាត់ទុកថា វាមានសារៈសំខាន់ក្នុងការស្វែងរកការគាំទ្រពីដៃគូនៃក្រុមប្រទេសទាំងប្រាំពីរ ជាពិសេសសហរដ្ឋអាមេរិក ប្រសិនបើចំណាត់ការនោះពាក់ព័ន្ធនឹងប្រាក់ដុល្លារដែលធម្មតាមានផលប៉ះពាល់យូរអង្វែងជាងសកម្មភាពឯកតោភាគី៕