ប្រជាជនអាល់ហ្សេរីបានប្រារព្ធពិធីរំលឹកខួបឯករាជ្យជាតិរបស់ប្រទេសនេះកាលពីថ្ងៃអង្គារ (៤ កក្កដា) មួយថ្ងៃមុនថ្ងៃពិធីផ្លូវការ ដោយមានមនុស្សរាប់រយនាក់បានដើរតាមដងផ្លូវក្នុងការប្រារព្ធពិធី។ ក្បួនដង្ហែដែលពោរពេញដោយរបាំប្រពៃណី និងតន្ត្រីពេញផ្លូវនៃរដ្ឋធានី Algiers (អាល់ហ្សេ) ខណៈដែលមនុស្សម្នាបានទស្សនា និងអបអរសាទរពីខាងក្រៅ។

អ្នកស្រី Asma ពលរដ្ឋអាល់ហ្សេរី ដែលនៅក្នុងពិធីអបអរនោះបាននិយាយថា “ពួកយើងមកចូលរួមអបអរសាទរទិវាបុណ្យឯករាជ្យជាតិ ហើយយើងបាននាំកូនៗមកមើល និងរៀនអំពីប្រទេសរបស់ពួកយើង។ យើងចង់ឲ្យកូនៗបានសិក្សាប្រវត្តិសាស្ត្រប្រទេស និងអ្វីដែលបានកើតឡើងនៅក្នុងប្រទេសរបស់ខ្លួន ហើយកុំភ្លេចវាឲ្យសោះ”។

ប្រទេសអាល់ហ្សេរីបានស្ថិតនៅក្រោមការគ្រប់គ្រងរបស់បារាំងអស់រយៈពេល ១៣២ឆ្នាំរហូតដល់ប្រទេសនេះបានឈ្នះសង្រ្គាមទាមទារឯករាជ្យនៅឆ្នាំ១៩៦២។ រវាងឆ្នាំ ១៩៥៤និងឆ្នាំ១៩៦២ ប្រទេសបារាំងបានធ្វើសង្រ្គាមប្រឆាំងនឹងចលនាឯករាជ្យមួយនៅក្នុងអាណានិគមនៅពេលនោះ ហើយជនជាតិអាល់ហ្សេរីរាប់សែននាក់ត្រូវបានសម្លាប់៕