អ៊ុយក្រែន៖ មានការសង្គ្រោះបន្ទាន់ថ្មី នៅរដ្ឋធានីគីវប្រទេសអ៊ុយក្រែន កាលពីថ្ងៃពុធ។ ពុំមែនជាការបាញ់ផ្លោង ការបាញ់មីស៊ីល ឬដ្រូននោះទេ ប៉ុន្តែបណ្តាលមកពីឧបករណ៍បំផ្ទុះ ដែលបាបំផ្ទុះនៅខាងក្នុងបរិវេណតុលាការ។ 

សមាជិក២នាក់នៃអង្គភាពកងកម្លាំងសន្តិសុខឆ្លើយតបរហ័សពិសេស បានរងរបួសអំឡុងឧបទ្ទវហេតុ។ ឧបទ្ទហេតុនេះ បុរសម្នាក់ បានឃុំឃាំងខ្លួនឯងនៅក្នុងតុលារការទីក្រុង Shevchenkivskyi នៅមជ្ឈមណ្ឌលទីក្រុង មុនពេលមានការបំផ្ទុះ២គ្រាប់ ត្រូវបានលាន់លឺ។ 

រដ្ឋមន្ត្រីក្រសួងមហាផ្ទៃ លោក Ihor Klymenko បានកំណត់អត្តសញ្ញាណបុរសម្នាក់នោះឈ្មោះ Ihor Humenyuk និងបាននិយាយថា បុរសនោះបានស្លាប់នៅក្នុងការបំផ្ទុះ ហើយអ្នកជំនាញដោះគ្រាប់បែក បានស្ថិតនៅកន្លែងកើតហេតុ ដើម្បីធានាបានថាគ្មានឧបករណ៍បំផ្ទុះបន្ថែមទៀតនោះទេ។ 

តាមសេចក្តីរាយការណ៍ Humenyuk បានស្ថិតនៅក្នុងតុលាការ ជាជនសង្ស័យម្នាក់ជាប់ទាក់ទងទៅនឹងការស្លាប់របស់ឆ្មាំជាតិអ៊ុយក្រែន៤នាក់ កាលពីឆ្នាំ២០១៥។

បន្ទាប់ពីសវនាការ បុរសរូបនេះត្រូវបានគេនិយាយថា បានចាក់សោរខ្លួនឯងនៅក្នុងបន្ទប់ទឹក និងបានបោះឧបករណ៍ផ្ទុះ២គ្រាប់ដាក់ទៅលើកងកម្លាំងឆ្មាំការពារ។ លោក Klymenko និយាយថា ជីវិតរបស់ឆ្មាំទាំងនោះ ត្រូវបានជួយសង្គ្រោះដោយខែលការពាររបស់ពួកគេ ប៉ុន្តែមួយចំនួនបានរងរបួសស្រាលនៅជើងរបស់ពួកគេ។ ការស៊ើបអង្កេតមួយត្រូវបានធ្វើឡើង ដើម្បីកំណត់ថាតើបុរសនេះមានគ្រឿងផ្ទុះនៅក្នុងតុលាការដោយរបៀបណា។