អាមេរិក៖ អភិបាលរដ្ឋវ៉ាស៊ីនតោន លោក Jay Inslee និយាយថា រដ្ឋនេះនឹងដំណើរការទៅរកការបើកឡើងវិញពេញលេញ នូវដំណើរការសេដ្ឋកិច្ចរបស់ខ្លួននៅថ្ងៃទី៣០ ខែមិថុនា។ លោក Inslee បាននិយាយថា ទីក្រុងវ៉ាស៊ីនតោននឹងអនុម័តនូវការណែនាំថ្មី ដែលផ្ដល់ដោយមជ្ឈមណ្ឌលសហព័ន្ធសម្រាប់ការការពារ និងគ្រប់គ្រងជំងឺ ដែលបានបន្ធូរបន្ថយការពាក់ម៉ាសភាគច្រើន សម្រាប់មនុស្សដែលទទួលវ៉ាក់សាំងពេញលេញ។
អាជីវកម្មនឹងរក្សាសិទ្ធិក្នុងការទាមទារឱ្យអតិថិជនពាក់ម៉ាស ហើយការពាក់ម៉ាស់នៅតែត្រូវបានទាមទារនៅក្នុងមន្ទីរពេទ្យ សាលារៀន និងនៅលើមធ្យោបាយធ្វើដំណើរសាធារណៈ។ ជិត ៤៤% នៃមនុស្សដែលមានអាយុចាប់ពី ១៦ឆ្នាំឡើងទៅបានទទួលវ៉ាក់សាំងពេញលេញនៅក្នុងរដ្ឋវ៉ាស៊ីនតោន។ លោក Inslee បាននិយាយថា រដ្ឋនៅមានសមត្ថភាព ៥០% សម្រាប់សកម្មភាពភាគច្រើននៅក្នុងរដ្ឋនេះ រហូតដល់វាឈានដល់សមត្ថភាពពេញលេញនៅចុងខែមិថុនា។ នាវាទេសចរណ៍ខ្នាតតូចដែលមានអ្នកដំណើរតិចជាង ២៥០នាក់អាចជិះកម្សាន្តបាន ប្រសិនបើនាវិក និងអ្នកដំណើរ ៩៥% បានទទួលការចាក់វ៉ាក់សាំងរួច។ ដូចគ្នានេះដែរ ពិធីមង្គលការ និងពិធីបុណ្យសពអាចមានសមត្ថភាពពេញលេញ ប្រសិនបើអ្នកចូលរួមទាំងអស់បានចាក់វ៉ាក់សាំង។
លោក Inslee និយាយថា លោកកំពុងសម្លឹងមើលការជំរុញទឹកចិត្តបន្ថែម សម្រាប់ប្រជាជនក្នុងការចាក់វ៉ាក់សាំង រួមមានការដកការកំណត់ចំនួនអ្នកចូលរួម ដែលបានចាក់វ៉ាក់សាំងរួច នៅកន្លែងកីឡាទាំងខាងក្នុង និងខាងក្រៅ។ លោក Inslee បាននិយាយថា ក្រសួងពាណិជ្ជកម្មរដ្ឋកំពុងធ្វើការជាមួយសមាគមធុរកិច្ចទីក្រុងវ៉ាស៊ីនតោន ក្នុងការផ្ដល់ប័ណ្ណអំណោយដល់ពាណិជ្ជកម្មក្នុងស្រុក សម្រាប់ប្រជាជនដែលបានចាក់វ៉ាក់សាំងថ្មីៗនេះ និងក្រុមប្រឹក្សាភិបាលទទួលបន្ទុកផលិតផលស្រា កំពុងធ្វើការលើសំណើពីរោងចក្រផលិតស្រា និងស្រាបៀរ ដើម្បីអនុញ្ញាតឱ្យអតិថិជនចាក់វ៉ាក់សាំងទទួលបានភេសជ្ជៈឥតគិតថ្លៃ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
