ប្រធានក្រុមហ៊ុនបណ្ដាញសង្គម Meta លោក Mark Zuckerberg បាននិយាយថាកម្មវិធីទូរសព្ទឈ្មោះថា Threads ដែលទើបនឹងដាក់ដំណើរការថ្មីរបស់ក្រុមហ៊ុននេះ មានគោលបំណងដើម្បីប្រកួតប្រជែងជាមួយកម្មវិធីបណ្ដាញសង្គម Twitter។ ក្រុមអ្នកជំនាញនិយាយថា កម្មវិធី Threads អាចទាក់ទាញអ្នកប្រើប្រាស់កម្មវិធី Twitter ដែលមិនសប្បាយចិត្តជាមួយនឹងការផ្លាស់ប្តូរថ្មីៗចំពោះវេទិកានៅក្នុងបណ្ដាញសង្គមនោះ។

កម្មវិធី Threads ដែលមិនត្រូវបានដាក់ឱ្យដំណើរការនៅក្នុងសហភាពអឺរ៉ុបសម្រាប់ពេលនេះ អនុញ្ញាតឱ្យអ្នកប្រើប្រាស់បង្ហោះសាររហូតដល់ ៥០០តួអក្សរ និងមានមុខងារជាច្រើនស្រដៀងទៅនឹងកម្មវិធី Twitter ដែរ។ លោក Zuckerberg បាននិយាយថា កម្មវិធីនេះបានឆ្លងកាត់ការចុះឈ្មោះចំនួន ១០លានគណនីក្នុងរយៈពេល ៧ម៉ោងដំបូង។

នៅពេលត្រូវបានសាកសួរនៅលើកម្មវិធី Threads ថាតើកម្មវិធីនេះនឹងធំជាងកម្មវិធី Twitter ដែរឬទេ លោក Zuckerberg បាននិយាយថា "វានឹងត្រូវការពេលវេលាបន្ថែមទៀត ប៉ុន្តែខ្ញុំគិតថាគួរតែមានកម្មវិធីសន្ទនាសាធារណៈមួយ ដែលមនុស្សជាង ១ពាន់លានប្រើប្រាស់វា"។

ក្រុមដៃគូប្រកួតប្រជែងបានរិះគន់ចំនួនទិន្នន័យដែលកម្មវិធីនេះអាចប្រើ។ នេះអាចរួមបញ្ចូលទិន្នន័យសុខភាព ហិរញ្ញវត្ថុ និងរុករកដែលភ្ជាប់ទៅអត្តសញ្ញាណរបស់អ្នកប្រើប្រាស់ នេះបើយោងតាមកម្មវិធីទាញយក App Store របស់ក្រុមហ៊ុន Apple។

បច្ចុប្បន្ននេះ កម្មវិធី Threads អាចទាញយកបាននៅក្នុងប្រទេសជាង១០០ រួមទាំងចក្រភពអង់គ្លេស ប៉ុន្តែមិនទាន់មាននៅក្នុងសហភាពអឺរ៉ុបនៅឡើយទេ ដោយសារតែមានការព្រួយបារម្ភអំពីនិយ័តកម្ម៕