លោកប្រធានាធិបតីអ៊ុយក្រែន វ៉ូឡូមៀរ ហ្សេលេនស្គី បានថ្លែងថា លោកបានប្រាប់មេដឹកនាំដឹកនាំអាមេរិកនិងអឺរ៉ុបថា អ៊ុយក្រែនចង់ចាប់ផ្តើមវាយបកឲ្យបានឆាប់ ប៉ុន្តែខ្លួនត្រូវការអាវុធបន្ថែមសម្រាប់ការវាយបកនោះ។

យោងតាមមេដឹកនាំអ៊ុយក្រែនរូបនេះ ការវាយបកនោះ ត្រូវបានពន្យារពេល ដោយសារមានការលំបាកនៅសមរភូមិ។ 

លោកបាននិយាយក្នុងបទសម្ភាសន៍មួយជាមួយសារព័ត៌មានCNNថា៖«ខ្ញុំចង់ឲ្យការវាយបករបស់យើងកើតឡើងឲ្យបានឆាប់ ដោយសារអ្នកគ្រប់គ្នាយល់ថា ប្រសិនបើការវាយបករបស់យើង កើតឡើងនៅពេលក្រោយនោះ នោះមួយផ្នែកធំនៃដែនដីរបស់យើង នឹងត្រូវបានគេដាក់មីន។ យើងផ្តល់ឲ្យសត្រូវរបស់យើងនូវពេលវេលា និងលទ្ធភាពដើម្បីដាក់មីនបន្ថែម និងរៀបចំខ្សែត្រៀមការពាររបស់ពួកគេ»។  

លោកហ្សេលេនស្គី បានថ្លែងថា៖«ខ្ញុំដឹងគុណអាមេរិកជាមេដឹកនាំគាំទ្រពួកយើង ប៉ុន្តែខ្ញុំបានប្រាប់ពួកគេរួមទាំងក្រុមមេដឹកនាំអឺរ៉ុបផងដែរថា យើងចង់ចាប់ផ្តើមការវាយបករបស់យើងនៅពេលឆាប់ជាងនេះ ហើយយើងត្រូវការអាវុធ និងសម្ភារៈសម្រាប់ការវាយប្រហារបក»។ ប្រសិនបើយើងចាប់ផ្តើមនៅពេលក្រោយ វានឹងយឺតពេល»៕