​បាល់ទាត់៖ ​ខ្សែប្រយុទ្ធ AC Milan, Zlatan Ibrahomovic ​នឹងត្រូវ​អវត្តមាន​ពី​ការប្រកួត​បាល់ទាត់​ជើងឯក​ទ្វីបអឺរ៉ុប​ឆ្នាំនេះ​ ដោយសារតែ​របួស​ជង្គង់​។ ​កីឡាករ​វ័យ ៣៩ឆ្នាំ​រូបនេះ​ត្រូវបាន​កោះហៅ​ចូល​ក្រុម​ជំរើសជាតិ​ស៊ុយអែត​វិញ​ កាលពី​ខែមីនា​កន្លងមកបន្ទាប់ពី​ចូលនិវត្តន៍​។

​​Zlatan បាន​បង្ហោះ​នៅលើ​បណ្តាញ​សង្គម Twitter របស់ខ្លួន​ថា គេ​បាន​ប្រាប់​គ្រូបង្វឹក​ស៊ុយអែត Janne Andersson ​ថា ​រូបគេ​មិនអាច​ចូលរួម Euro ឆ្នាំនេះ​ជាមួយ​ក្រុម​ស៊ុយអែត​បានឡើយ ​ដោយសារតែ​របួស​ជង្គង់​។ ​របួស​របស់ Zlatan គឺ​នៅពេល AC Milan ជួប​ជាមួយ Juventus កាលពី​ថ្ងៃទី៩ ខែឧសភា​កន្លងទៅ​។ ​Ibrahimovic​ ដែល​ស៊ុត​បាន ៦៩គ្រាប់​អោយ​ក្រុម​ជំរើសជាតិ​ស៊ុយអែត និង​ជា​អ្នក​ស៊ុត​បញ្ចូល​ទី​អោយ​ក្រុម​ជំរើសជាតិ​ផងដែរ​នោះ ត្រូវបាន​ផ្លាស់ប្តូរ​ចេញ​អំឡុង​ការប្រកួត​ទល់នឹង Juventus នៅ​នាទី​ទី៦៦ ក្នុង​ជ័យជំនះ ៣-០។

​​បន្ទាប់ពី​ចូលនិវត្តន៍​ពី​ក្រុម​ស៊ុត​អែ​ត​អស់​រយៈពេល ៥ឆ្នាំ Zlatan Ibrahimovic ​បាន​វិល​មកវិញ ​និង​បាន​បង្ហាញខ្លួនពេល​ស៊ុយអែត​យកឈ្នះ​ហ្ស​ក​ហ្ស៊ី​ ក្នុង​ការប្រកួត​ជំ​រុះ World Cup កាលពី​ខែមីនា​។ ​ការ​ប្រកួត Euro ២០២០ នឹង​ចាប់ផ្តើម​នៅ​ថ្ងៃទី១១ ខែមិថុនា​ខាងមុខ​ បញ្ចប់​នៅ​ថ្ងៃទី១១ ខែកក្កដា ​ដោយ​ស៊ុយអែត​ស្ថិតក្នុង​ពូ​ល E ជាមួយ​ក្រុម​អេ​ស្ប៉ា​ញ ប៉ូឡូញ និង​ស្លូ​វ៉ា​គី​៕

​អត្ថបទ​៖​នាង សុភា​វុ​ធ