អាមេរិក ៖ យោងតាមសេវាព្យាករណ៍អាកាសធាតុជាតិអាមេរិក (NWS) ក្នុងរយៈពេល៤ថ្ងៃគិត​ចាប់ពីថ្ងៃចន្ទដើម​សប្ដាហ៍នេះ មកសីតុណ្ហភាពជាមធ្យមលើពិភពលោកបានហក់ឡើង​ដល់កម្រិតខ្ពស់​បំផុត៣ថ្ងៃជាប់​ថ្ងៃគ្នា​ខណៈរលកកម្ដៅហក់ឡើងខ្ពស់បានបន្តប៉ះពាល់ដល់ប្រទេសជា​​ច្រើននៅលើពិភពលោក។

សេវាព្យាករណ៍អាកាសធាតុជាតិអាមេរិក បាននិយាយថាសីតុណ្ហភាពជាមធ្យមលើពិភពលោក​កាលពីថ្ងៃព្រហស្បិ៍​សប្ដាហ៍​នេះ បានកើនឡើងដល់១៧,២៣អង្សាសេ ដែលជាការកើនឡើង​ជាថ្មីសម្រាប់សីតុណ្ហភាព​ជាធមធ្យម​សកលខ្ពស់បំផុត ដែលបានតាមដានដោយមជ្ឈមណ្ឌលជាតិសម្រាប់ការព្យាករណ៍បរិស្ថានរបស់សហរដ្ឋអាមេរិក កាលពីឆ្នាំ១៩៧៩។

ក្នុងរយៈពេល៤ថ្ងៃ សីតុណ្ហភាពរបស់ភពផែនដីបានកើនឡើងខ្ពស់៣ដង ដោយបានហក់ឡើង​ដល់១៧,០១អង្សា​សេ​កាលពីថ្ងៃចន្ទ ១៧,១៨អង្សាសេកាលពីថ្ងៃអង្គារ ដែលនៅតែបន្តកើនឡើងសីតុណ្ហភាពកាលពីថ្ងៃពុធនិង១៧,២៣អង្សាសេ​កាលពីថ្ងៃព្រហស្បតិ៍។

លោក រ៉ូបើត រ៉ូដ (Robert Rohde) អ្នកវិទ្យាសាស្ត្រនៅ Berkeley Earth ជាវិទ្យាស្ថានស្រាវជ្រាវមិន​ស្វែងរក​ប្រាក់​ចំណេញ បាននិយាយថា ការកើនឡើងថ្មីៗ នៃសីតុណ្ហភាពជាធម្យមរបស់ពិភពលោក គឺដោយសារ​តែការកើន​ឡើងកម្ដៅ​សកលរយៈពេលយូរដែលបណ្ដាលមកពីការបញ្ចេញ​ឧស្ម័នផ្ទះកញ្ជក់និងការហក់​ឡើងសីតុណ្ហភាព​​រយៈពេលខ្លី បណ្ដាលមកពីបាតុភូតអេលនីញូ ។ សីតុណ្ហភាពជាធម្យមលើពិភពលោក នឹងបន្តនៅ រយៈ​ពេល១ខែកន្លះទៀត៕