កណ្ដាល៖ បណ្តាមេឃុំ និងចៅសង្កាត់ បានអំពាវនាវឲ្យបណ្តាពលរដ្ឋត្រូវរាយការណ៍​ទៅ​កាន់រដ្ឋបាល​ឃុំសង្កាត់ ​ជាបន្ទាន់ករណីពលរដ្ឋណាបាននិងកំពុងប្រើប្រាស់​ ឬជាប់​អត្តសញ្ញាណ​បណ្ណ​សញ្ជាតិខ្មែរ បញ្ចាំនៅតាម បណ្តាគ្រឹះស្ថានហិរញ្ញវត្ថុ ​ប្រតិបត្តិករកម្ចី ហាងលក់ទំនិញ ឬកន្លែង​ទទួលបញ្ចាំក្នុងប្រព័ន្ធឬក្រៅប្រព័ន្ធ ដើម្បីឲ្យរដ្ឋបាលសង្កាត់ ជួយ​សម្របសម្រួលយក​អត្តសញ្ញាណបណ្ណនោះយកមកវិញ ​ដើម្បីយកទៅប្រើប្រាស់បោះឆ្នោត។

បើតាមលោក ជា សុខៃ ​ចៅសង្កាត់ចាក់អង្រែក្រោម រាជធានីភ្នំពេញបានថ្លែងប្រាប់BTV ​នៅថ្ងៃទី១០ ខែកក្កដានេះថា ​មកដល់ពេលនេះ មន្ត្រីរដ្ឋបាលសង្កាត់ចាក់អង្រែក្រោម ​បានចុះណែនាំទៅ​ដល់​បណ្តា ​គ្រឹះស្ថានហិរញ្ញវត្ថុ ​ប្រតិបត្តិករកម្ចីជនបទក្នុងប្រព័ន្ធ ​ឬក្រៅប្រព័ន្ធ ​ហាងលក់ទំនិញ​ប្រើប្រាស់ ឬកន្លែង​ទទួលបញ្ចាំ ​ដែលបានយកអត្តសញ្ញាណបណ្ណសញ្ជាតិខ្មែរ​ពីប្រជាពលរដ្ឋទៅដាក់​បញ្ចាំ​សម្រាប់ធានាលើការផ្តល់ឥណទាន​ ឬកម្ចីផ្សេងៗ ​គឺត្រូវផ្តល់អត្តសញ្ញាណបណ្ណសញ្ជាតិខ្មែរច្បាប់​ដើមឲ្យទៅពលដ្ឋ ​ដែលជាអតិថិជនរបស់ខ្លួនវិញ ​ដើម្បីឲ្យគាត់យកអត្តសញ្ញាណបណ្ណនោះ យក​ទៅប្រើប្រាស់​បោះឆ្នោត ជ្រើសតាំងតំណាងរាស្ត្រនីតិកាលទី៧ ​នៅថ្ងៃទី២៣ ខែកក្កដានេះ។

លោក ជា សុខៃ បញ្ជាក់ថា រដ្ឋបាលសង្កាត់របស់លោក នឹងអនុវត្តតាមផ្លូវច្បាប់​ ចំពោះករណី គ្រឹះស្ថានហិរញ្ញវត្ថុ ​ប្រតិបត្តិករកម្ចីជនបទ ​ហាងលក់ទំនិញប្រើប្រាស់​ ឬកន្លែងទទួលបញ្ចាំក្នុងប្រព័ន្ធ ក្រៅប្រព័ន្ធ និង អាជីវកម្មអត់ច្បាប់ណា ដែលបានយកអត្តសញ្ញាណបណ្ណច្បាប់​ដើមរបស់ពលរដ្ឋធ្វើ​ជាទ្រព្យធានាបញ្ចាំ ​ហើយមិនព្រមប្រគល់អត្តសញ្ញាណបណ្ណច្បាប់ដើមនោះឲ្យទៅពលរដ្ឋ ដើម្បី​ឲ្យគាត់យកទៅប្រើប្រាស់ដើម្បីបោះឆ្នោត។

សូមបញ្ជាក់ថា ថ្មីៗនេះ ក្រសួងមហាផ្ទៃបានណែនាំឱ្យរដ្ឋបាលរាជធានី ខេត្តត្រូវបង្កើតក្រុមការងារ​មួយ​ដើម្បីចុះស្រង់​ និងរៀបចំបញ្ជី និងកំណត់អត្តសញ្ញាណឲ្យបានច្បាស់លាស់ ទៅលើ​គ្រឹះស្ថាន​ហិរញ្ញវត្ថុ ​ប្រតិបត្តិករកម្ចីហាងលក់ទំនិញប្រើប្រាស់ ​ឬកន្លែងទទួលបញ្ចាំជនបទក្នុងប្រព័ន្ធ ឬក្រៅ​ប្រព័ន្ធ ដែលមានប្រជាពលរដ្ឋបានយកអត្តសញ្ញាណបណ្ណសញ្ជាតិខ្មែរ​ទៅដាក់បញ្ចាំសម្រាប់​ធានាលើការផ្តល់ឥណទាន​ ឬកម្ចី ​គឺត្រូវយកអត្តសញ្ញាណបណ្ណថតចម្លង ហើយត្រូវប្រគល់​យកអត្តសញ្ញាណបណ្ណសញ្ជាតិខ្មែរច្បាប់ដើមឲ្យពលរដ្ឋវិញ៕អត្ថបទ ស៊ុម សុខជា