កម្លាំងសន្តិសុខរបស់ប៉ាឡេស្ទីន បានរៀបចំមូលដ្ឋាន ដើម្បីត្រៀមសម្រាប់ដំណើរទស្សនកិច្ចដ៏កម្ររបស់ប្រធានាធិបតីលោក Mahmoud Abbas ទៅកាន់ទីក្រុង Jenin នៅថ្ងៃពុធ (ទី១២ ខែកក្កដា) ពោលគឺមួយសប្តាហ៍ បន្ទាប់ពីអ៊ីស្រាអែលបានធ្វើការវាយឆ្មក់ដ៏ធំបំផុតរបស់ខ្លួន នៅទីនោះរបស់តំបន់វ៉េសប៊ែង (West Bank) ក្នុងរយៈពេលជាច្រើនឆ្នាំ។

គេរំពឹងថា លោក Abbas ទៅដល់ទីក្រុង Jenin នៅវេលាម៉ោង ១:០០នាទី ហើយស្នាក់នៅទីនោះប្រហែល ២ម៉ោង។ លោកគ្រោងនឹងដាក់កម្រងផ្កានៅផ្នូររបស់ជនជាតិប៉ាឡេស្ទីន ដែលត្រូវបានគេសម្លាប់ក្នុងការវាយឆ្មក់ កាលពីសប្តាហ៍មុន។

ប្រតិបត្តិការរយៈពេល ២ថ្ងៃរបស់អ៊ីស្រាអែល ដែលយោធាបាននិយាយថា ផ្តោតលើហេដ្ឋារចនាសម្ព័ន្ធ និងឃ្លាំងអាវុធរបស់ពួកសកម្មប្រយុទ្ធ នៅជំរំជនភៀសខ្លួន ក្នុងទីក្រុង Jenin បានធ្វើឲ្យផ្លូវថ្នល់ខូច និងឆេះអស់រថយន្តជាច្រើន ហើយបានបង្កឲ្យមានកំហឹងពាសពេញពិភពអារ៉ាប់។

យ៉ាងហោចណាស់ជនជាតិប៉ាឡេស្ទីន ១២នាក់ ដែលភាគច្រើនត្រូវបានបញ្ជាក់ថា ជាយុទ្ធជនសកម្មប្រយុទ្ធត្រូវបានសម្លាប់ និងប្រហែល១០០នាក់ បានរងរបួស នៅក្នុងការលុកលុយ ដែលបានចាប់ផ្តើមជាមួយនឹងការវាយប្រហារដោយយានដ្រូន នាពេលយប់ ដែលតាមមកដោយប្រតិបត្តិការវាយលុក ជាមួយនឹងទាហានអ៊ីស្រាអែលចំនួនជាង ១.០០០នាក់។ មានការរាយការណ៍ថា ទាហានអ៊ីស្រាអែល ក៏មានស្លាប់ម្នាក់ដែរ៕