រដ្ឋអាជ្ញា នៅឯការិយាល័យក្រសួងយុត្តិធម៌ បាននិយាយ កាលពីថ្ងៃពុធ (ទី១២ ខែកក្កដា) ថា តុលាការ ក្នុងប្រទេសកាតេម៉ាឡា បានសម្រេចព្យួរគណបក្សរបស់បេក្ខជនប្រធានាធិបតីប្រឆាំងអំពើពុករលួយលោក Bernardo Arevalo ដែលការសម្រេចនេះ បានបង្កើតជាសំណួរពីស្ថានភាពរបស់លោក ក្នុងការបោះឆ្នោតជុំទី២។

ប៉ុន្តែក្នុងបទសម្ភាសន៍ជាមួយទូរទស្សន៍ CNN លោក Arevalo បាននិយាយថា លោកជំទាស់នឹងការព្យួរនេះ ហើយការព្យួរនោះនឹងដាក់ចេញរូបលោក មិនឲ្យប្រកួតប្រជែងតំណែងប្រធានាធិបតីនោះទេ។

ដោយបញ្ជាក់ពីច្បាប់របស់កាតេម៉ាឡា ដែលចែងថា គណបក្សនយោបាយមួយមិនអាចត្រូវបានព្យួរ នៅពាក់កណ្តាលផ្លូវនៃការបោះឆ្នោតទេនោះ លោក Arevalo បាននិយាយអំពីសាលដីការបស់តុលាការនេះថា៖ «វាជាភ័ស្តុតាងដែលបង្ហាញថា ផ្លូវច្បាប់គ្មានខ្លឹមសារនោះឡើយ ។ គ្មានផ្លូវ ដែលយើងនឹងគោរពតាមការសម្រេចមិនសមហេតុផល និងខុសច្បាប់ ដូចការសម្រេចរបស់តុលាការនេះឡើយ»។

រដ្ឋអាជ្ញា លោក Rafael Curruchiche បាននិយាយមុននេះ ក្នុងវីដេអូមួយ ដែលបានបង្ហោះនៅលើបណ្ដាញសង្គម Twitter ថា ការស៊ើបអង្កេតបានបង្ហាញពីភាពមិនប្រក្រតីក្នុងការចុះឈ្មោះសមាជិកជាង ៥.០០០នាក់នៃគណបក្សនិយមឆ្វេងកណ្ដាល Semilla របស់លោក Arevalo។

គួរបញ្ជាក់ដែរថា លទ្ធផលនៃការបោះឆ្នោតជុំទី១ នៅថ្ងៃទី២៥ ខែមិថុនា បានបង្ហាញថា លោក Arevalo កំពុងប្រឈមជាមួយអ្នកបញ្ចប់នៅចំណាត់ថ្នាក់លេខ១ និងជាអតីតស្ត្រីទី១ លោកស្រី Sandra Torres ក្នុងការបោះឆ្នោតប្រធានាធិបតីជុំទី២ ដែលកំណត់ធ្វើនៅខែក្រោយ៕