កាលពីថ្ងៃព្រហស្បតិ៍ម្សិលមិញ ប្រទេសអេហ្ស៊ីប បានព្យាយាមសម្របសម្រួលភាគីបង្កសង្រ្គាមស៊ូដង់ នៅកិច្ចប្រជុំកំពូលក្នុងតំបន់ ដែលជាការប៉ុនប៉ងចុងក្រោយគេនៃកិច្ចខិតខំអន្តរជាតិ ដើម្បីទប់ស្កាត់កុំឲ្យសង្រ្គាមស៊ីវិលមួយនេះអូសបន្លាយពេល ហើយនិងធ្វើឲ្យវិបត្តិមនុស្សធម៌កាន់តែជ្រៅទៅ ។ 

ប្រធានាធិបតីអេហ្ស៊ីបលោក Abdel Fattah al-Sisi បានបង្ហាញផែនការគំនិតផ្តួចផ្តើមដល់ភាគីចូលរួមកិច្ចប្រជុំ ដោយផ្អែកលើបទឈប់បាញ់ ការបើកច្រកសុវត្ថិភាពសម្រាប់ជំនួយ ការជជែកទូលំទូលាយ និងយន្តការទំនាក់ទំនងជាមួយភាគីបង្កសង្រ្គាម ។  

ប្រភពព័ត៌មានពីអេហ្ស៊ីប បានឲ្យដឹងថា ផែនការរបស់ពួកគេ មានគោលដៅសម្រេចឲ្យបានបទឈប់បាញ់រយៈពេល ៣ខែ ហើយនិងបើកផ្លូវជំនួយ តាមរយៈការកោះហៅកិច្ចប្រជុំជាមួយក្រុមមេដឹកនាំយោធា និងក្រុមមេដឹកនាំជនជាតិដើមភាគតិច ដោយទាញយកប្រយោជន៍ទំនាក់ទំនងរយៈពេលវែង ។  

មេដឹកនាំមួយចំនួនដែលបានចូលរួមកិច្ចប្រជុំ ហាក់ដូចជាស្វាគមន៍ផែនការផ្តួចផ្តើមគំនិតរបស់អេហ្ស៊ីប ។  

យោងតាមការអះអាងរបស់អង្គការសហប្រជាជាតិ បានឲ្យដឹងថា ជនស៊ីវិលជាង ១ពាន់នាក់ ត្រូវបានសម្លាប់ និងមនុស្ស ៣លាននាក់ ត្រូវបានជម្លៀសខ្លួន ក្នុងនោះមនុស្ស ៧០ម៉ឺននាក់ ត្រូវបានជម្លៀសខ្លួនទៅកាន់ប្រទេសជិតខាង ចាប់តាំងសង្រ្គាមផ្ទុះឡើងរវាងកងទ័ពស៊ូដង់ និងកងកម្លាំងឆ្លើយតបរហ័ស( RSF) កាលពីខែមេសាកន្លងទៅ ៕