ភ្នំពេញ៖ នាព្រឹកថ្ងៃទី១៤ ខែកក្កដា ឆ្នាំ២០២៣ នៅទីស្តីការក្រសួង ឯកឧត្តម ជា វ៉ាន់ដេត រដ្ឋមន្ត្រី​ក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតី​ក្នុងសិក្ខាសាលា​ផ្សព្វផ្សាយ ស្តីពី «សមិទ្ធផល និងការងារអភិវឌ្ឍន៍ធនធានមនុស្ស ក្នុងវិស័យឌីជីថលនៅកម្ពុជា» ដោយ​មាន​ការ​អញ្ជើញ​ចូលរួមពីថ្នាក់នាំក្រសួង ក្រុមហ៊ុនឯកជនដែលជាប្រតិបតិ្តករ ភាគីពាក់ព័ន្ធ​ក្នុង​វិស័យ​បច្ចេកវិទ្យា​គមនាគមន៍ និងព័ត៌មាន ប្រមាណ ៧៥រូប។

នៅក្នុងឱកាសនោះ ឯកឧត្តមរដ្ឋមន្ត្រី បានជម្រាបជូនអំពីសមិទ្ធផល​នានា​របស់​ក្រសួង​ប្រៃសណីយ៍ និង​ទូរគមនាគមន៍ ដែលសម្រេចបាននាពេលកន្លងមក ដូចជាការអភិវឌ្ឍ​ធនធាន​មនុស្ស ដើម្បីលើកកម្ពស់ចំណេះដឹងឌីជីថល ការជំរុញការចាប់យកឌីជីថល និងការ​បង្កើត​កម្មវិធីប្រកួតប្រជែង ព្រមទាំង​ជម្រាប​ជូន​បន្ថែម​អំពីការ​កសាង​ហេដ្ឋា​រចនា​សម្ព័ន្ធ​តភ្ជាប់​ឌីជីថល ការពង្រឹងគុណភាពសេវាទូរសព្ទចល័ត ការធ្វើឱ្យសេវាទូរគមនាគមន៍កាន់តែប្រសើរឡើង ដើម្បី​ឆ្លើយតបទៅនឹងកំណើននៃតម្រូវការប្រើប្រាស់។

ជាមួយគ្នា​នោះដែរ ឯកឧត្តមរដ្ឋមន្ត្រី បានពិភាក្សា​ជា​មួយ​ក្រុម​ហ៊ុន​ឯកជន​លើ​ការងារ​អភិវឌ្ឍន៍​ធនធាន​មនុស្សក្នុ​ង​វិស័យ​ឌីជីថល​​នៅ​កម្ពុជា​នា​ពេល​អនាគត​ឱ្យ​កាន់​តែមា​ន​ភាព​ប្រសើរ​ឡើង​បន្ថែម​ទៀត។​

ឯកឧត្ដមក៏បានម្រាបជូនក្រុមហ៊ុនបច្ចេកវិទ្យាដែលមានគំនិតអាជីវកម្ម​ ឬគម្រោងល្អៗ​សម្រាប់​បម្រើ​ដល់​វិស័យសាធារណ:និងវិស័យឯកជន​ អាចដាក់ពាក្យមកទទួលជំនួយបច្ចេកទេស​ និង​ហិរញ្ញ​វត្ថុពីក្រសួងផងដែរ។