រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីថ្ងៃសុក្រថា មាន​ការគាំទ្រយ៉ាងទូលំទូលាយ នៅក្នុងកិច្ចប្រជុំរបស់លោកជាមួយបណ្តាប្រទេសអាស៊ីអាគ្នេយ៍ សម្រាប់​ការបន្តដាក់សម្ពាធលើរបបសឹកមីយ៉ាន់ម៉ាឱ្យបញ្ចប់អំពើហិង្សានៅក្នុងសហភាពនេះ។ លោក Blinken បាននិយាយនៅក្នុងសន្និសីទសារព័ត៌មានក្នុងទីក្រុងហ្សាកាតា ប្រទេស​ឥណ្ឌូនេស៊ី បន្ទាប់ពីបានចូលរួមកិច្ចប្រជុំពាក់ព័ន្ធនឹងកិច្ចប្រជុំអាស៊ានថា ស្ថានភាព​នៅ​សហភាព​មីយ៉ាន់ម៉ា ចាប់តាំងពីរដ្ឋប្រហារខែកុម្ភៈ ឆ្នាំ២០២១ បន្តធ្វើឱ្យអន្តរាយដល់សន្តិសុខក្នុងតំបន់។ លោក Antony Blinken បាននិយាយថា របបសឹកមីយ៉ាន់ម៉ា ត្រូវតែត្រូវ​បាន​ជំរុញ​ ដើម្បី​ឱ្យ​បញ្ឈប់​អំពើ​ហិង្សា និងអនុវត្តផែនការសន្តិភាព ដែលខ្លួនបាន​ព្រម​ព្រៀង​ជាមួយ​ប្រទេស​ជិតខាង​អាស៊ី​អាគ្នេយ៍ កាលពី២ឆ្នាំមុន។ ការថ្លែងបែបនេះ ធ្វើឡើងក្នុងពេល​ក្រោយ​សន្និសីទ​ថ្នាក់​រដ្ឋមន្ត្រី នៃ​សមាគម​ប្រជាជាតិអាស៊ីអាគ្នេយ៍ ឬអាស៊ាន នៅទីក្រុងហ្សាកាតា អំឡុងពេល លោក Blinken ក៏​បាន​ចូលរួមក្នុងកិច្ចប្រជុំទ្វេភាគីជាមួយសមភាគីឥណ្ឌូណេស៊ី លោកស្រី Retno Marsudi ព្រម​ទាំង​អ្នក​ការទូតកំពូលរបស់ប្រទេសចិន លោក Wang Yi ។ អាស៊ាន បានរារាំងរបបសឹកនេះ មិនឲ្យ​ចូលរួមកិច្ចប្រជុំកំពូលរបស់ខ្លួនចំពោះការខកខានមិនបានអនុវត្ត មតិឯកច្ឆ័ន្ទប្រាំចំណុច ជាដំណើរ​ការផ្នែកការទូតតែមួយគត់ក្នុងតួនាទីដើម្បីទទួលបានសន្តិភាពនៅ មីយ៉ាន់ម៉ា ដែល​អង្គការ​សហប្រជាជាតិបានប៉ាន់ប្រមាណថាមនុស្ស ១,៥ លាននាក់ត្រូវបានជម្លៀសខ្លួនចេញ។ រដ្ឋមន្ត្រីការបរទេសឥណ្ឌូនេស៊ី លោកស្រី Retno Marsudi បាននិយាយថា ការអនុវ​ត្ត​ផែន​ការ​សន្តិភាព​ដែល​បានព្រមព្រៀងជាមួយមេដឹកនាំរបបសឹកមីយ៉ាន់ម៉ានៅឆ្នាំ ២០២១ នៅតែជា​អាទិភាព​ សម្រាប់អាស៊ាន។ លោកស្រីបាននិយាយថា បញ្ហាមីយ៉ាន់ម៉ា មានភាពស្មុគស្មាញខ្លាំង ហើយ​សមាគមប្រជាជាតិអាស៊ីអាគ្នេយ៍ត្រូវតែធ្វើរឿងដែលត្រឹមត្រូវ ស្របទៅ​តាម​ផែន​ការ​សន្តិភាព​ប្រាំ​ចំណុច។ អាស៊ានកំពុងព្យាយាមដើម្បីកាត់បន្ថយវិបត្តិបង្ហូរឈាមនៅក្នុងរដ្ឋជាសមាជិករបស់ខ្លួនមីយ៉ាន់ម៉ា ដែលយោធាកំពុងកាន់អំណាចត្រូវបានថ្កោលទោសយ៉ាងខ្លាំងនៅក្នុងវេទិកាកាលពីថ្ងៃសុក្រចំពោះអំពើ​ឃោរឃៅរបស់ខ្លួនចំពោះជនស៊ីវិល៕ អត្ថបទ៖ ប៊ុនថាន