​បាល់ទាត់៖ ​ការប្រកួត​វគ្គ Play-Off រក​កៅអី​ឡើង​មក English Premier League បាន​ចាប់ផ្តើម​ហើយ​យប់មិញ​ដោយ Bournemouth និង Swansea សុទ្ធតែ​ឈ្នះ​នៅ​ជើ​ទី​១​។ ​​Bournemouth ជា​ក្រុម​លេខ ៦ ក្នុង​តារាង​បើកទ្វារ​ផ្ទះ​ទទួល Brentford​ ដែល​ក្រុម​លេខ ៣ ក្នុង​តារាង​។

​​គ្រាប់​បាល់​របស់ Arnaut Danjuma​ ជា​អ្នក​ស៊ុត​បញ្ចូល​ទី​ ១​គ្រាប់​ជ័យជំនះ​ឲ្យ Bournemouth ក្រោម​ក្រសែភ្នែក​ទស្សនិកជន​ក្រុម​ម្ចាស់ផ្ទះ​ដែល​ត្រូវ​បាន​កំណត់​ត្រឹម ២​ពាន់​នាក់​។ ​​ក្រុម​ភ្ញៀវ Brentford​ មានការ​គ្រប់គ្រង​បាល់ និង​មានឱកាស​ច្រើនជាង​ក្រុម​ម្ចាស់ផ្ទះ​តែ​រក​គ្រាប់​បាល់​មិនបាន ដែល​ធ្វើ​អោយ​ក្រុម​អតីត​ខ្សែ​ការពារ Real Madrid, Jonathan Woodgate កាន់ ​១​គ្រាប់​ចំណេញ​មុន​ត្រលប់​ទៅ​ទឹកដី Brentford​ វិញ​ចុង​សប្តាហ៍​នេះ​។ ​​នេះ​ជា​បរាជ័យ​ដំបូង​របស់ Brentford ​ក្នុង ១៣ប្រកួត​ចុងក្រោយ​ ស្របពេល Bournemouth ស្គាល់​ឈ្នះ​លើកដំបូង​ក្រោយ​ចាញ់ ៣ប្រកួត​ចុងក្រោយ​។

​​ងាក​មក​មួយ​ប្រកួត​ទៀត​ Barnsley ​ក្រុម​លេខ ៥ ក្នុង​តារាង​ទទួលភ្ញៀវ Swansea ជា​ក្រុម​លេខ ៤ ក្នុង​តារាង​។ ​​Andre Ayew​ ជា​អ្នក​រកបាន​គ្រាប់​ជ័យជំនះ​អោយ Swansea ក្នុង​ដំណើរ​ស្វែង​រក​កៅអី​ឡើងមក Premier League តាំងពី​ធ្លាក់​ទៅ League Championship ឆ្នាំ២០១៨​។ ​​ចំណែក Barnsley ​ខកខាន​លេង​នៅ​ក្របខណ្ឌ​កំពូល​អង់គ្លេស​តាំងពី​រដូវ​កាល ១៩៩៧-៩៨​។ ​​ក្រុម​ទាំងពីរ​នឹង​ជួបគ្នា​ជើង​ទី២ នៅ​ទឹកដី Swansea វិញ​ថ្ងៃ​សៅរ៍​នេះ ​ដើម្បី​រក​កៅអី​ឡើង​វគ្គ​ផ្តាច់ព្រ័ត្រ​នៅ​ថ្ងៃទី២៩ ចុងខែ​នេះ​នៅ​កីឡដ្ឋាន Wembley៕

​អត្ថបទ​៖​នាង សុភា​វុ​ធ