ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) និងនាយករដ្ឋមន្ត្រី​ឥណ្ឌា​លោក ណារិនដ្រា ម៉ូឌី (Narendra Modi) បាន​ជួបជាមួយ​ក្រុម​នាយកប្រតិបត្តិ នៃ​ក្រុមហ៊ុន​របស់​ប្រទេសឥណ្ឌា មុនពេលចូលរួមពិធីជប់លៀងសាយភោជន៍លំដាប់រដ្ឋ នៅទីក្រុង​ប៉ារីស កាលពីថ្ងៃសុក្រ (ទី១៤ ខែកក្កដា)។

ជំនួប​ជាមួយថ្នាក់ដឹកនាំធុរកិច្ច នៅក្រសួងការបរទេស បានធ្វើឡើងបន្ទាប់ពីលោក ម៉ូឌី (Modi) បាន​ចូលរួមក្នុងពិធីដើរក្បួនយោធាប្រពៃណីទិវាជាតិ Bastille Day របស់ប្រទេសបារាំង។ ក្នុង​ពិធីនេះ លោក ម៉ាក្រុង (Macron) ត្រូវបានចូលរួមដោយរដ្ឋមន្ត្រីការបរទេសបារាំង និងអឺរ៉ុប លោកស្រី កាធឺរីន កូឡូនណា (Catherine Colonna)។

ហើយបន្ទាប់មក នៅពេលល្ងាច លោក ម៉ាក្រុង (Macron) បានរៀបចំលៀងសាយភោជន៍ ដើម្បី​ជា​ការ​ផ្ដល់កិត្តិយសដល់លោក ម៉ូឌី (Modi) នៅសារមន្ទីរ Louvre ជាផ្នែកមួយ​នៃ​ដំណើរ​ទស្សនកិច្ច​ដែល​មានការចុះហត្ថលេខាលើកិច្ចព្រមព្រៀងការពារជាតិកម្រិតខ្ពស់។

សូមបញ្ជាក់ថា លោក ម៉ូឌី (Modi) បានចាប់ផ្តើមដំណើរទស្សនកិច្ចរយៈពេល ២ថ្ងៃទៅ​កាន់ទីក្រុង​ប៉ារីស​ប្រទេសបារាំង កាលពីថ្ងៃព្រហស្បតិ៍ (ទី១៣ ខែកក្កដា) នៅពេលដែលរូបលោក បានទទួល​ពានរង្វាន់ Legion of Honour ដែលជាពានរង្វាន់ខ្ពស់បំផុតរបស់ប្រទេសបារាំង៕