​អូឡាំពិក៖ ​មនុស្ស​ប្រមាណ ៣០នាក់​បាន​ជួបជុំគ្នានៅ​ស្ថានីយ​រថភ្លើង​ក្នុង​ទីក្រុង​តូ​ក្យូ ដើម្បី​ប្រឆាំង​តវ៉ា​មិន​ចង់​អោយ​មាន​ការរៀបចំ ​ព្រឹត្តិការណ៍​អូឡាំពិក​រដូវ​កាល​ក្តៅ​។ ​​បាតុកម្ម​ចាប់ផ្ដើម​ផ្ទុះឡើង​បណ្ដើរ​ៗ​ហើយ ដែល​ទង្វើ​នេះ​បន្ទាប់​ប្រធាន​គណៈកម្មាធិការ​អូឡាំពិក​អន្តរជាតិ IOC លោក Thomas Bach បាន​លុបចោល​ដំណើរ​ទស្សនកិច្ច​របស់​ខ្លួន​ មកកាន់​ទីក្រុង​តូ​ក្យូ​ដោយ​សារតែ​វិបត្តិ Covid-19 ប្រទេស​ជប៉ុន​។

​​លោកតា Hiroshi Hoshino វ័យ ៧១ឆ្នាំ​បាន​និយាយ​ថា​ លោក Thomas Bach មិន​មក​ក៏​ព្រោះ​តែ​ស្ថានភាព​ជំងឺ Covid-19 នៅ​ទី​នេះ​កំពុង​ស្ថិត​ក្នុង​ស្ថានភាព​អាក្រក់ ហើយ​ច្បាស់​ណាស់​ថា ​ប្រជាជន​ជប៉ុន​ជាច្រើន​មិន​ចង់​អោយ​មាន​ ការរៀបចំ​អូឡាំពិក​រដូវក្តៅ​នេះ​ឡើយ​។ ​​បើ​យោង​តាម​ការស្ទង់មតិ​ដែល​បាន​ចុះផ្សាយ​ដោយ​កាសែត Asahi បាន​ឲ្យដឹង​ថា ​មនុស្ស ១៥២៧នាក់​ដែល​ត្រូវ​បាន​ស្ទង់​មតិ​នោះ​មាន​ជាង ៨០% ទៅ​ហើយ​ដែល​ចង់​ឲ្យ​អូឡាំពិក​លុប​ចោល រឺ​លើក​ពេល​ទៅ​មុខ​ទៀត​។ ​​កាលពី​ថ្ងៃអាទិត្យ​កន្លងទៅ ​រដ្ឋាភិបាល​ជប៉ុន​បាន​ប្រកាស​ពន្យារពេល ការ​ដាក់​ប្រទេស​ក្នុង​គ្រាអាសន្ន​នៅ​ទីក្រុង​តូ​ក្យូ និង​តំបន់​ចំនួន ៥ ផ្សេងទៀត បន្ទាប់ពី​ជប៉ុន​កំពុង​រងគ្រោះ​នៃ​ការ​ឆ្លង​រីក​រាលដាល​មេរោគ Covid-19 ប​ម្លែ​ង​ខ្លួន​ពី​ចក្រភព​អង់គ្លេស​។

​តំបន់​បន្ថែមចំនួន ៣ រួមមាន​កោះ Hokkaido, Hiroshima និង Okayama នឹង​ចូល​រួម​ជាមួយ​ទីក្រុង Tokyo និង​ Osaka​ និង​ខេត្ត​ចំនួន ៤​ផ្សេងទៀត​ដែល​សុទ្ធតែ​ទីតាំង​ប្រកួត​អូឡាំពិក​នោះ សុទ្ធតែ​ស្ថិត​នៅ​ក្រោម​ការ​រឹតត្បិត ដើម្បី​ទប់ស្កាត់​ការ​ចម្លង​រហូតដល់​ថ្ងៃ​ទី​៣១ ខែ​ឧសភា​។ រង្គ​សាល​ ហាង​ខារ៉ាអូខេ ​និង​កន្លែង​កម្សាន្ត​ភាគច្រើន​ត្រូវ​បិទទ្វារ​។ ម្ចាស់​អាជីវកម្ម​ដែល​គោរព​តាម​នឹង​ទទួល​បាន​សំណង ឯ​អ្នក​ដែល​មិន​គោរព​ប្រឈម​នឹង​ការ​ពិន័យ​។​ ជប៉ុន​មកដល់ពេលនេះ​មាន​អ្នក​ឆ្លង Covid-19 សរុប​ជិត ៧០​ម៉ឺន​នាក់ និង​មាន​អ្នក​ស្លាប់​ជាង ១​ម៉ឺន​នាក់​៕

​អត្ថបទ​៖​នាង សុភា​វុ​ធ