ទូរទស្សន៍រដ្ឋ CCTV បានរាយការណ៍ថា ទឹកជំនន់ដ៏គំហក់ បានធ្វើឲ្យរថយន្ត និងប្រជាពលរដ្ឋ​ជាប់ក្នុង​ទឹកហូរនៅទីក្រុង Chongqing និងតំបន់ម៉ុងហ្គោលីក្នុង ខណៈដែលតំបន់ផ្សេងទៀត​នៅក្នុង​ប្រទេសចិន ជួបរលកកម្តៅ ។ 

ទឹកជំនន់ដ៏គំហុកបណ្តាលមកពីភ្លៀងធ្លាក់ខ្លាំង បានវាយប្រហារ​តំបន់ជាច្រើន​របស់ចិន​រយៈពេល​ប៉ុន្មាន​សប្តាហ៍​កន្លងទៅ ក្នុងនោះទីក្រុង Chongqing( ឆុងឈីង) រងផលប៉ះពាល់​ខ្លាំងជាង​គេ​រយៈពេល​ប៉ុន្មាន​ថ្ងៃចុងក្រោយនេះ ។ 

CCTV រាយការណ៍ថា តំបន់ម៉ុងហ្គោលីក្នុង ស្ថិតនៅភាគខាងជើងប្រទេសចិន បានរងផល​ប៉ះពាល់​​ដោយសារតែព្យុះភ្លៀងខ្លាំងកាលពីថ្ងៃសុក្រ ហើយអ្នកស្រុកមួយចំនួន ត្រូវបាន​ជួយ​សង្រ្គោះពី​ផ្ទះរងការជន់លិចរបស់ពួកគេ ដោយក្រុមភ្នាក់ងារពន្លត់អគ្គិភ័យក្នុងស្រុក ។ 

 ស្រប​ពេល​ដែលក្រុមអាជ្ញាធរចេញផែនការសង្រ្គោះបន្ទាន់ និងព្រមានពីការជន់លិច និង​បំណាក់​ដី​នៅ​តាម​តំបន់មួយចំនួននោះ មន្ទីរឧតុនិយមជាតិ បានចេញ​សេចក្តី​ប្រកាស​អាសន្ន​កម្រិត​ពណ៌​លឿង សម្រាប់រលកកម្តៅនៅទូទាំងប្រទេស ក្នុងនោះសីតុណ្ហភាពបានឡើងដល់ ៤៥អង្សា​សេ​នៅ​ខេត្តហ្សីនជាំង ប្រទេសចិន៕