ទូកបូមខ្សាច់ដែលប្រើប្រាស់ ដើម្បីបូមរ៉ែមាសខុសច្បាប់ ត្រូវបានគេដុតកម្ទេចចោល​នៅតំបន់ភាគខាងជើង​ប្រទេសបូលីវី អំឡុងប្រតិបត្តិការបញ្ឈប់ការរករ៉ែខុសច្បាប់​នៅតំបន់ព្រៃជាប់ទឹកភ្លៀងអាម៉ាហ្សូន ។ 

 ក្រុមនគរបាល និងកងទ័ព បានចុះប្រតិបត្តិការរយៈពេល ៦ថ្ងៃដែលបានបញ្ចប់កាលពីថ្ងៃសុក្រ ជាមួយនឹងការចាប់ខ្លួនជនសង្ស័យ ៥៧នាក់ ដែលចូលរួមសកម្មភាពរករ៉ែមាសខុសច្បាប់ ហើយនិងរឹបអូសបានទូកបូមខ្សាច់ ២៧គ្រឿង ។ 

 រូបភាពវីដេអូឃ្លីប ដែលចែករំលែកដោយរដ្ឋាភិបាលបូលីវី ឃើញក្រុមមន្រ្តីវាយឆ្មក់ទូកបូមខ្សាច់ ដោយមានក្រុមអ្នករករ៉ែ និងកម្មករនៅលើទូក ហើយបន្ទាប់មក ទូកបូមខ្សាច់ទាំងអស់នោះ ត្រូវបានដុកបំផ្លាញចោល ។ 

ជាការឆ្លើយតបនឹងការវាយឆ្មក់​នេះដែរ ក្រុមអ្នករករ៉ែ និងប្រជាពលរដ្ឋក្នុងស្រុក បានចេញតវ៉ានៅតាមផ្លូវកាលពីថ្ងៃសៅរ៍ ដោយពួកគេអះអាងថា ពួកគេរករ៉ែមាសដោយស្របច្បាប់ ៕