​ប្រណាំង​កង់៖ ​កីឡាករ​​ស្លូ​វ៉ា​គី Peter Sagan បាន​ប្រជែង​ឈ្នះ​ដំណាក់កាល​ទី១០ នៃ​ការ​ប្រកួត​ប្រណាំង​កង់ Grand Tour, Giro d’Italia​ ថ្ងៃ​ចន្ទ​ម្សិលមិញ​នេះ ​ខណៈ​អ្នក​នាំ​មុខ​គេ​នៅតែ​ជា​កីឡាករ​កូ​ឡុំ​ប៊ី Egan Bernal​។​

​​ដំណាក់កាល​ទី ១០ ដែលមាន​ចម្ងាយ​ផ្លូវ ១៣៩​គីឡូ​ម៉ែត្របញ្ចប់​នៅ ​Foligno ​កីឡាករ​របស់​ក្រុម​ប្រណាំង Bora-Hansgrohe, Peter Sagan បានមក​ដល់ទី​ព្រ័ត្រ​មុនគេ​ចំណាយពេល ៣ម៉ោង ១០នាទី ៥៦វិនាទី ​តាម​ពីក្រោយ​ដោយកីឡាករ​កូ​ឡុំ​ប៊ី Fernando Gaviria និង​កីឡាករ​អ៊ីតាលី​ Davide Cimolai ​ដែល​អ្នក​ទាំងបី​សុទ្ធតែ​ប្រើ​ថេរវេលា​ដូចគ្នា​។​ ​​យ៉ាងណាក្តី​ក្រោយ ១០ ដំណាក់កាល​នេះ​កីឡាករ​របស់​ក្រុម Ineos Grenadiers, Egan Bernal អតីត​ជើងឯក Tour de France នៅតែ​ជា​អ្នកកាន់កាប់​តារាងពេល​វេលា​រួម​ ដោយមាន​ពេលវេលា​ចំណេញ ១៤វិនាទី​ពីលើ​អ្នក​លេខ២ កីឡាករ​ប៊ែ​ល​ហ្ស៊ិ​ក Remco Evenepoel និង ២២វិនាទី​ពីលើ​អ្នក​លេខ៣ កីឡាករ​រុស្ស៊ី Aleksandr Vlasov​។ ​​ថ្ងៃ​អង្គារ​នេះ​មិន​មាន​ការប្រកួត​ឡើយ​គឺជា​ថ្ងៃ​សម្រាក មុនពេល​បន្តដំណើរ​ដំណាក់កាល​ទី ១១ ទៀត​នៅ​ថ្ងៃ​ពុធ​ស្អែក​លើ​ចម្ងាយ​ផ្លូវ ១៦២​គីឡូ​ម៉ែត្រ​ចេញដំណើរ​ពី Perugia ទៅ Montalcino៕

​អត្ថបទ​៖​នាង សុភា​វុ​ធ