រុស្ស៊ី ៖ កាលពីថ្ងៃចន្ទ រុស្ស៊ីបាននិយាយថា កងកម្លាំងរបស់ខ្លួនបានវាយប្រហារអ៊ុយក្រែននៅទីក្រុង Donetsk និងតំបន់ Krasny Liman ខណៈដែលអ៊ុយក្រែនបាននិយាយថា ខ្លួនបានបើកការវាយប្រហារលើទីតាំងកាំភ្លើងធំនានារបស់រុស្ស៊ី និងគ្រឿងយុទ្ធោបករណ៍ផ្សេងៗទៀត។

នៅក្នុងសន្និសីទសារព័ត៌មានប្រចាំថ្ងៃ ក្រសួងការពារជាតិរុស្ស៊ីបានរាយការណ៍ថា កងកម្លាំងរបស់ខ្លួនបាន​កម្ទេច​ទាហាន​អ៊ុយក្រែនប្រហែល៣៥នាក់នៅក្នុងទីក្រុង Kupyansk ក្នុងរយៈពេលមួយថ្ងៃកន្លងមក ហើយបាន​វាយរុញ​វាយប្រហារជាច្រើនលើករបស់អ៊ុយក្រែននៅភាគខាងត្បូងទីក្រុង Donetsk និងទីក្រុងKherson។

កងកម្លាំងរុស្ស៊ីក៏បានវាយកម្ទេចឃ្លាំងគ្រាប់រំសេវជាច្រើនរបស់អ៊ុយក្រែននៅក្នុងតំបន់ Zaporozhye, ទីក្រុងLuhansk និងទីក្រុង Donetsk កាលពីថ្ងៃអាទិត្យផងដែរ។

អគ្គសេនាធិការនៃកងកម្លាំងប្រដាប់អាវុធអ៊ុយក្រែនកាលពីថ្ងៃចន្ទបានចេញរបាយការណ៍មួយដោយនិយាយថា ក្នុង​រយៈពេល ២៤ម៉ោងកន្លងមកនេះ មានការប្រយុទ្ធប្រហែល ២៩ដងរវាងកងកម្លាំងអ៊ុយក្រែន​និងកងទ័ពរុស្ស៊ី​នៅទីក្រុង Kupiansk, តំបន់Krasny Liman, ទីក្រុង Bakhmut និងតំបន់ផ្សេងៗទៀត។

កងកម្លាំងអាកាសអ៊ុយក្រែន អង្គភាពមីស៊ីល និងអង្គភាពកាំភ្លើងធំ បានបើកការវាយប្រហារលើគោលដៅយោធា រួមទាំងទីតាំងកាំភ្លើងធំ នានានិងបុគ្គលិកយោធារុស្ស៊ី ព្រមទាំងតំបន់ប្រមូលផ្តុំគ្រឿងយុទ្ធោបករណ៍របស់រុស្ស៊ីផងដែរ៕