អាមេរិក ៖ ក្រុមមួយដែលតំណាងឲ្យក្រុមហ៊ុនប្រព័ន្ធផ្សព្វផ្សាយបាននិយាយកាលពីថ្ងៃចន្ទថា ស្ទូឌីយោទូរទស្សន៍​និងភាពយន្តធំៗ បានផ្តល់ឲ្យតារាហូលីវូតទឹកប្រាក់ចំនួន១ពាន់លានដុល្លារក្នុងសំណងកាន់តែខ្ពស់ និងបាន​ជំរុញអត្ថប្រយោជន៍ មុនពេលសហជីព SAG-AFTRA អំពាវនាវការធ្វើកូដកម្មកាលពី​សប្តាហ៍មុន។ ​ក្រុមផលិតករទូរទស្សន៍ និង​សម្ព័ន្ធ​រូប​ភាពមានចលនា ដែលចរចាជំនួសមុខឲ្យក្រុមហ៊ុន Netflix Inc ក្រុមហ៊ុន Walt Disney Co ក្រុមហ៊ុន Warner Bros Discovery និងក្រុមហ៊ុនមួយចំនួនផ្សេងទៀត បាននិយាយថាសហជីព SAG-AFTRA បន្តបង្ហាញ​លក្ខណៈ​មិន​ត្រឹមត្រូវចំពោះការចរចា។

សហជីព SAG-AFTRA បានអំពាវឲ្យធ្វើកូដកម្មកាលពីថ្ងៃព្រហស្បតិ៍កន្លងទៅ បន្ទាប់ពីអ្នកចរចារបស់សហជីព និយាយថាពួកគេពុំអាចឈានដល់កិច្ចព្រមព្រៀងមួយជាមួយស្ទូឌីយោលើកិច្ចសន្យារយៈពេល៣ឆ្នាំជាថ្មី ជាមួយអត្ថប្រយោជន៍ខ្ពស់ជាងនេះ និងការកំណត់លើការប្រើប្រាស់រូបភាពរបស់ពួកគេដោយបញ្ញាសប្បនិម្មិត។ ផលិតករទូរទស្សន៍ និងសម្ព័ន្ធរូបភាពមានចលនា បាននិយាយនៅក្នុងសេចក្តីថ្លែងការណ៍ថា កិច្ចព្រមព្រៀង​ដែល​សហជីព SAG-AFTRA បានដើរចេញកាលពីថ្ងៃទី១២ ខែកក្កដា មានតម្លៃជាង១ពាន់លាន​ដុល្លារជាការ​កើនឡើង​ប្រាក់ឈ្នួល ប្រាក់សោធននិវត្តន៍ និងការរួមចំណែកសុខភាព និងការបង្កើនជីវភាពរស់នៅ ហើយរួមទាំង​ការការពារ​រយៈពេលអណត្តិ៣ឆ្នាំ រួមមានការគោរពច្បាស់លាស់ចំពោះបញ្ញាសប្បនិម្មិត។ កាលពីព្រឹកថ្ងៃចន្ទ សហជីព SAG-AFTRA ដែលតំណាងឲ្យតារាភាពយន្ត អ្នកសំដែងដ៏ទាក់ទាញ និងអ្នកផ្សេងទៀតជាង១៦០.០០០ នាក់ បានបញ្ចេញ​បញ្ជីលម្អិតនៃសំណើរបស់ខ្លួន និងអ្វីដែលខ្លួននិយាយថា ជាការឆ្លើយតបរបស់ខាងស្ទូឌីយោដែលសរសេរថា «យើងកំពុង​ប្រយុទ្ធប្រឆាំងសម្រាប់ការរស់ឡើងវិញនូវអាជីពរបស់យើង។