ស្ទឹងត្រែង៖រដ្ឋបាលខេត្តស្ទឹងត្រែងបានប្រកាសនៅថ្ងៃនេះពីការរកឃើញយុវជនម្នាក់អាយុ ១៨ឆ្នាំ បានឆ្លងមេរោគកូវីដ-១៩ នៅស្រុកថាឡាបរិវ៉ាត់បន្ទាប់ពីយុវជនរូបនោះបានធ្វើដំណើរពីស្រុកកោះធំ ខេត្តកណ្ដាល។
ក្នុងសេចក្ដីប្រកាសព័ត៌មាននៅថ្ងៃនេះ រដ្ឋបាលខេត្តស្ទឹងត្រែងបញ្ជាក់ថា យុវជនអាយុ ១៨ឆ្នាំរូបនេះ ត្រូវបានរកឃើញឆ្លងមេរោគកូវីដ-១៩នៅថ្ងៃនេះ នៅឯភូមិស្រឡៅ ឃុំអន្លង់ជ្រៃ។
បើតាមសេចក្ដីប្រកាសព័ត៌មាន យុវជនរូបនេះ ត្រូវបានបញ្ជូនទៅសម្រាកព្យាបាលនៅឯមន្ទីរពេទ្យបង្អែកខេត្តជាទីដែលអ្នកជំងឺកូវីដ-១៩ចំនួន ២នាក់ផ្សេងទៀត កំពុងស្ថិតក្រោមការព្យាបាលផងដែរ។
រដ្ឋបាលខេត្តស្ទឹងត្រែង បញ្ជាក់ទៀតថា យុវជនរូបនេះ បានធ្វើដំណើរវិលត្រឡប់ពីខេត្តកណ្ដាលកាលពីថ្ងៃសៅរ៍សប្ដាហ៍មុនហើយមានប្រវត្តិធ្លាប់ប្រាស្រ័យទាក់ទងជាមួយអ្នកជំងឺកូវីដ-១៩ចំនួន ៥នាក់នៅក្នុងគ្រួសារមួយនៅឯភូមិព្រែកតារ័ត្ន ស្ថិតក្នុងឃុំពោធិ៍បាន ស្រុកកោះធំ។
រដ្ឋបាលខេត្តនេះ បានឱ្យដឹងទៀតថា មនុស្ស ៤នាក់ផ្សេងទៀត ដែលបានពាក់ព័ន្ធនឹងយុវជនរូបនេះ ត្រូវបានធ្វើតេស្តរួចហើយដែរ ហើយលទ្ធផលអវិជ្ជមាន ប៉ុន្តែ ត្រូវបានដាក់ឱ្យស្ថិតនៅក្នុងមណ្ឌលចត្តាឡីស័កកម្រិតស្រាល«ស្រឡៅ» ស្ថិតក្នុងស្រុកថាឡាបរិវ៉ាត់។
រដ្ឋបាលខេត្តនេះ បញ្ជាក់ទៀតថា យុវជនរូបនេះ បានធ្វើដំណើរតាមរថយន្តដឹកបន្លែមួយគ្រឿងមួយជាមួយមនុស្ស ៥នាក់ផ្សេងទៀតហើយអាជ្ញាធរខេត្តនេះកំពុងស្វែងរកមនុស្សទាំង ៥នាក់នោះ ដើម្បីពិនិត្យសំណាក និងដាក់ឱ្យនៅដាច់ដោយឡែកដើម្បីតាមដានសុខភាព៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
