ភ្នំពេញ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចក្នុងការចាក់វ៉ាក់សាំងការពារជំងឺ Covid-19 ក្នុងក្របខណ្ឌទូទាំងប្រទេស បានមានប្រសាសន៍ថា ដំណើរការចាក់វ៉ាក់សាំងជូនប្រជាពលរដ្ឋទូទៅដែលមានអាយុចាប់ពី ១៨ឆ្នាំឡើងទៅដោយចាប់ផ្តើមពីមូលដ្ឋានខណ្ឌបឹងកេងកង និងខណ្ឌសែនសុខ ដែលបានចាប់ផ្តើមដំណើរទៅនៅថ្ងៃទី១៨ ខែឧសភានេះ គឺប្រព្រឹត្តទៅបានយ៉ាងល្អ និងមានការសាទរជាខ្លាំងពីសំណាក់ប្រជាពលរដ្ឋ។
នេះបើតាមការថ្លែងប្រាប់របស់ លោកជំទាវ ឱ វណ្ណឌីន នៅក្នុងឱកាសលោកជំទាវ ចុះមកពិនិត្យកិច្ចការចាក់វ៉ាក់សាំងជូនប្រជាពលរដ្ឋនៅទីតាំងសាលាបឋមសិក្សា ប៊ុនរ៉ានី ហ៊ុនសែន សាមគ្គី ដែលមានទីតាំងស្ថិតនៅក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។
បន្ថែមពីនេះ អាជ្ញាធរមូលដ្ឋាន លោក ញ៉ាត សាម៉េត ដែលជាចៅសង្កាត់គោកឃ្លាង ក៏បានក្រើនរំលឹក និងអំពាវនាវជាថ្មីម្តងទៀត ចំពោះប្រជាពលរដ្ឋដែលមកទទួលការចាក់វ៉ាក់សាំងការពារជំងឺ Covid-19 ត្រូវរក្សាអោយបានដាច់ខាតនូវគម្លាតសុវត្ថិភាពសង្គម ពាក់ម៉ាស់ តម្រង់ជួរ និងចៀសវាងការឈរប្រជ្រៀតគ្នា ដោយត្រូវប្រកាន់ខ្ជាប់ការចូលរួមអនុវត្តនូវវិធានការសុខាភិបាល និងវិធានការ ៣ការពារ 3កុំ ដើម្បីចូលរួមចំណែកទាំងអស់គ្នា ក្នុងការបង្ការ ទប់ស្កាត់ និងផ្តាច់អោយបាននូវការឆ្លងរាលដាលនៃជំងឺ Covid-19 ក្នុងព្រឹត្តការណ៍សហគមន៍ ២០កុម្ភៈ។
គួរបញ្ជាក់ថា ចំពោះយុទ្ធនាការចាក់វ៉ាក់សាំងការពារជំងឺ Covid-19 ជូនប្រជាពលរដ្ឋដែលមានអាយុចាប់ពី ១៨ ឆ្នាំឡើងទៅ ដោយចាប់ផ្តើមដំណើរការដំបូងក្នុងមូលដ្ឋានខណ្ឌបឹងកេងកង និងខណ្ឌសែនសុខនេះ សម្រាប់ដូសទី១ គឺចាប់ផ្តើមពីថ្ងៃទី១៨ ខែឧសភានេះ រហូតដល់ថ្ងៃទី៣១ ខែឧសភាខាងមុខ ដែលមានរយៈពេល ១៤ថ្ងៃ រឺ២សប្ដាហ៍ ដោយឡែកសម្រាប់ដូសទី២ គឺចាប់ផ្តើមពីថ្ងៃទី១ ខែមិថុនា រហូតដល់ថ្ងៃទី១៥ ខែមិថុនា៕ អត្ថបទ៖ ជៀប សម្បត្តិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
