ប៉ាគីស្ថាន ៖ ប្រព័ន្ធផ្សព្វផ្សាយព័ត៌មានក្នុងស្រុក បានរាយការណ៍ កាលពីថ្ងៃអង្គារ (ទី១៨ ខែកក្កដា) ថារដ្ឋាភិបាលចម្រុះ​ដែលកំពុងកាន់អំណាចរបស់ប្រទេសប៉ាគីស្ថាន នឹងរំលាយសភា ហើយប្រគល់អំណាចទៅឲ្យរដ្ឋាភិបាលចាំផ្ទះ នៅខែ​ក្រោយ ពោលគឺមានរយៈពេល ៤ថ្ងៃ មុនពេលដែលសភានេះ ត្រូវរលាយតាមច្បាប់រដ្ឋធម្មនុញ្ញ ដើម្បីរៀបចំការ​បោះឆ្នោតសកលនៅខែវិច្ឆិកា។

ប៉ុស្តិ៍ទូរទស្សន៍ព័ត៌មានជាច្រើន បានរាយការណ៍ថា គណបក្សធំៗពីរ គឺសម្ព័ន្ធមូស្លីមប៉ាគីស្ថាន League-Nawaz (PML-N) និងគណបក្ស Peoples Party (PPP) របស់ប៉ាគីស្ថាន បានយល់ព្រមរំលាយសភា នៅថ្ងៃទី៦ ខែសីហា។ អាណត្តិរបស់សភានេះ ត្រូវផុតកំណត់នៅថ្ងៃទី១២ ខែសីហា។

យ៉ាងណាក៏ដោយ រដ្ឋមន្ត្រីក្រសួងព័ត៌មាន លោកស្រី Marriyum Aurangzeb បាននិយាយថា មិនទាន់មានការកំណត់​កាលបរិច្ឆេទ សម្រាប់ការបោះឆ្នោតទូទៅនៅឡើយទេ។

ដោយបញ្ជាក់បន្ថែមនូវការប្រកាសជាផ្លូវការអំពីកាលបរិច្ឆេទបោះឆ្នោត បន្ទាប់ពីការពិគ្រោះយោបល់ ក្នុងចំណោម​គណបក្ស​ដៃគូចម្រុះទាំងអស់ លោកស្រី Aurangzeb បាននិយាយតាមរយៈបណ្ដាញសង្គម Twitter ថា៖ «រហូតមកដល់ពេលនេះ នៅមិនទាន់មានការសម្រេចណាមួយ ត្រូវបានធ្វើឡើង ជុំវិញការរំលាយសភានោះទេ»។

ការបោះឆ្នោតកាន់តែខិតជិតមកដល់ បន្ទាប់ពីមានភាពចលាចលផ្នែកនយោបាយ និងសេដ្ឋកិច្ចជាច្រើនខែ ជាមួយនឹងភាព​មិនច្បាស់លាស់ សូម្បីតែរយៈពេលនៃការបោះឆ្នោត អាចនឹងត្រូវពន្យារពេលយ៉ាងហោចណាស់មួយឆ្នាំ។ រដ្ឋាភិបាលចម្រុះរបស់នាយករដ្ឋមន្ត្រីលោក Shehbaz Sharif បានចូលមកធ្វើតួនាទី បន្ទាប់ពីអ្នកកាន់តំណែងមុន លោក Imran Khan ត្រូវបានទម្លាក់ចេញពីអំណាច ក្នុងការបោះឆ្នោតដកសេចក្ដីទុកចិត្ត នៅសភា កាលពីខែមេសា ឆ្នាំ២០២២៕